Иако некои родители со гордост истакнуваат дека нивното бебе „ја прескокнало“ фазата на лазење и веднаш почнало да стои или да оди, детската физиотерапевт Ана Ешли предупредува дека тоа не е баш причина за славење.
Таа вели дека секој родител мора да знае дека „Лазењето носи толку многу придобивки за севкупниот развој на детето.“
Лазењето влијае врз развојот на мозокот
Ешли објаснува дека лазењето директно влијае на развојот на мозокот, бидејќи помага во комуникацијата помеѓу левата и десната хемисфера. Тоа е основа за многу подоцнежни вештини – вклучувајќи говор, читање и разбирање.
Лазењето ги зајакнува централните мускули, мускулите на рацете и на зглобовите, а сето тоа подоцна влијае врз способноста на детето за пишување, самостојно хранење и облекување. Покрај тоа, поврзано е со развој на видот, просторната свест и перцепцијата на длабочина – клучни елементи за безбедно и самоуверено движење низ просторот.
Можеби ви изгледа дека вашето бебе е „напредно“ ако веќе стои и се обидува да оди, но Ешли објаснува: „Стоењето и одењето всушност се полесни од лазењето, бидејќи многу деца во таа фаза ги блокираат зглобовите и користат напнатост за да останат исправени. Тоа не е показател на вистинска сила.“
Прераното стоење може да влијае негативно
Таа дополнително нагласува дека прераното поттикнување на стоење може негативно да влијае врз развојот на колковите. „Како што внимаваме на положбата на колковите кога ја носиме бебата во носилка, така треба да внимаваме и на положбата при стоење – а стоењето не е здраво за колковите пред околу седмиот месец“, вели таа.
Зошто некои бебиња не лазат?
Според детската ерготерапевтка Фиона О’Фарел, за да почне да лази, бебето треба да ги има развиено одредени предуслови:
- Доволно време на стомак – бебињата кои не поминуваат доволно време во оваа положба често подоцна лазат или воопшто ја прескокнуваат фазата.
- Сила во вратот, грбот и екстремитетите, како и координација на движењата.
- Самостојно седење и превртување, чекори што претходат на лазењето.
Како да го поттикнете бебето да започне да лази?
- Соблечете го до пелена – облеката како боди, панталончиња или хулахопки може да го ограничува движењето.
- Поставете го на стомак, на безбедна и чиста површина, под надзор.
- Ставете му омилена играчка малку надвор од дофатот – тоа ќе го мотивира да се обиде да стигне до неа.
Ако забележите дека детето сè уште не почнало да лазе, се движи само на задник или изгледа вкочането, добро е да се консултирате со детски физиотерапевт или ерготерапевт кој ќе процени дали е потребна дополнителна поддршка.
