Многу истражувања ги покажале придобивките од гушкањето, особено кај децата на кои им е потребен допир за да се развиваат, како емоционално, така и физички. Постојат неколку важни причини зошто е добро редовно да ги гушкате вашите деца. Пред се, прегратката е клучна за развојот на детскиот мозок.
Имено, експертите објаснуваат дека на мало дете за нормален развој му се потребни различни сензорни стимулации. Контактот кожа на кожа или физичкиот допир како што е гушкањето е една од најважните стимулации потребни за развој на здрав мозок, но и на моторни вештини.
Во една студија чии резултати се објавени во списанието Genetic Psychology Monographs, истражувачите откриле дека доенчињата кои биле гушкани по 20 минути дневно во текот на десет недели постигнале подобри резултати во проценките за развој од останатите деца.
Освен тоа, гушкањето е исто така од суштинско значење за физичкиот раст на детето. Научниците откриле дека кога децата се лишени од физички контакт, и покрај нормалното внесување на хранливи материи, нивните тела престануваат да растат. Работата е во тоа што при гушкањето, телото на детето го ослободува хормонот окситоцин, кој влијае на растот. Благодарение на окситоцинот, покрај растот, децата се и поотпорни и помалку склони на настинки, воспаленија во организмот и имаат посилен имунитет.
