Кога последен пат навистина ви било здодевно? Онаа тивка, малку непријатна здодевност што ве тера да запрете, да останете со сопствените мисли – без веднаш да посегнете по телефонот, музика или некоја обврска. Денес речиси заборавивме како изгледа таквиот момент, иако токму здодевноста е плодна почва за нови идеи, одмор на мозокот и длабока мисловна пауза. Ова чувство го „крадеме“ и од нашите деца. Постојано се трудиме да ги забавуваме, да ги вклучуваме во активности, да им го исполнуваме денот со стимулации. Истото го правиме и со бебињата. Но токму неструктуираното време – моментите кога нема ништо „планирано“ – се неопходни за сите нас. А кај бебињата, здодевноста носи дури и изненадувачки многу придобивки.
Здодевноста буди креативност
Д-р Роберт Хамилтон објаснува дека е исклучително важно бебето да има време за тишина и самостојна игра, дури и кога нам ни изгледа дека тоа време не е продуктивно. Напротив – тие моменти му овозможуваат да ги „свари“ сите доживувања од денот и самостојно да ја истражува околината, без постојани надворешни влијанија.
Кога децата се соочуваат со здодевност, се активира нивната природна креативност. Кога не знаат што да прават, почнуваат да забележуваат нови детали околу себе, да размислуваат поинаку, да создаваат свои игри и идеи. Истото важи и за возрасните — и за бебињата.
Според д-р Хамилтон, здодевноста е како ментално ѓубриво: за мозокот е тоа што вежбањето е за мускулите. Тој предупредува дека модерните родители премногу се трудат да го исполнат секој момент од детскиот, па дури и од бебешкиот живот со активности, игри и електронска стимулација — а на тој начин, без да сакаат, им ја одземаат можноста за внатрешен раст.
Убавината на секојдневниот живот
Она што навистина ги исполнува децата и бебињата не се спектакуларните активности, туку обичните моменти што ги делиме со нив. Вклучувањето во семејните рутини, вниманието кон малите чуда во нашата околина и уживањето во секојдневните ситуации е највредниот подарок што можеме да им го дадеме во годините на нивно формирање.
Затоа е важно да ги изложиме децата и на здодевни моменти — да им покажеме дека животот е составен и од возбудливи и од сосема обични денови. Кога ги вклучуваме во сите аспекти од животот, не само во најинтересните, им даваме можност да откриваат, да учат и да развиваат радозналост што ќе ги следи цел живот.
