Кога нам, на возрасните, ни опаѓа коса, тоа главно не не изненадува, па опаѓањето го препишуваме на сезоната (најчесто есента), стресот, недостатокот на одредени витамини… Меѓутоа, кога родителите ќе забележат дека на нивните деца им опаѓа косата, тоа навистина може да ги загрижи.
Опаѓањето на косата не е невообичаено ниту кај децата, а причините можат да бидат различни отколку кај возрасните, и често е поврзано и со состојбата на скалпот или кожата на главата. Во поголемиот дел од случаите опаѓањето на косата кај децата не е резултат на некоја опасна болест, но во случаи кога е многу изразено може да влијае и на психичката и емоционалната состојба на детето, па во тој случај вреди да се праша за помош од специјалист.
Причини за паѓање на косата кај децата
Опаѓањето на косата кај децата често е предизвикано од инфекција или некој друг проблем на скалпот, а ова се некои од најчестите причини.
Тинеа капитис
Станува збор за инфекција на кожата на главата која се пренесува доколку децата делат лични предмети како чешли, четки, капи… Позната е и како лишај на кожата на главата, иако всушност е предизвикана од габа.
Кај оваа инфекција карактеристично е тоа што влакната опаѓаат во прамени, а на местото каде што паднала косата се гледаат црни точки на кожата. Кожата може да биде црвена, да се лупи и да има нерамнини. Покрај ова, може да се појави и треска и отечени жлезди.
Ова заболување се лекува со антигабични лекови пропишани од лекар, а третманот трае околу осум недели. Антифунгалните шампони, покрај препишаните лекови, спречуваат инфекцијата да се пренесе и на други.
Алопеција ареата
Алопеција е автоимуна болест која предизвикува опаѓање на косата. Имуниот систем ги напаѓа фоликулите од кои растат влакната. Може да се појави во различни форми и од тоа зависи како и колку коса паѓа:
- Алопеција ареата: косата опаѓа во прамени, оставајќи „печати“ на главата
- Алопеција тоталис: целата коса паѓа
- Алопеција универзалис: сите влакна на телото паѓаат
Алопецијата ја дијагностицира лекар, а иако нема лек, постојат некои препарати кои можат да помогнат косата повторно да порасне.
Трихотиломанија
Трихотиломанија е нарушување поради кое децата компулсивно вадат прамени од косата. Експертите велат дека тоа е форма на опсесивно-компулсивно нарушување, а некои деца тоа го прават за да почувствуваат олеснување, додека други не се ни свесни дека сами си ја кубат косата.
Децата со ова нарушување може да имаат печати на кои им недостасува коса, но таа повторно ќе порасне кога ќе престанат да ја кубат, во што најчесто помага когнитивната терапија, пишува healthline.com.
Телоген ефлувиум
Телогенот е фаза на нормалниот циклус на раст на косата, кога косата привремено престанува да расте и одмора. Вообичаено е само 10 до 15 проценти од фоликулите на косата да бидат во оваа фаза во ист момент, што значи дека не престануваат да растат сите влакна, туку само одреден дел.
Кај децата кои имаат телоген ефлувиум, повеќе фоликули на косата влегуваат во оваа фаза отколку што би било нормално, па наместо, да речеме, детето да губи 100 влакна на ден како и обично, тоа губи 300 на ден. Ова опаѓање на косата може да биде незабележливо, а можат и да се формираат печати без коса на кожата на главата.
Телоген ефлувиум обично се јавува по некој екстремен настан, како што се многу висока телесна температура, операција, интензивна емоционална траума, сериозни повреди. Кога ќе помине тој настан, косата треба да порасне повторно.
Недостаток на хранливи материи
Здравата исхрана е важна за општото здравје, а кога децата не консумираат доволно витамини, протеини и минерали, косата може да им опаѓа. Опаѓањето на косата, исто така, може да биде знак за некои нарушувања во исхраната, како што се анорексија или булимија, а може да биде предизвикана и од недостаток на некои од следниве хранливи материи:
- Железо
- Цинк
- Ниацин
- Биотин
- Протеини и аминокиселини
Премногу витамин А исто така може да доведе до опаѓање на косата.
Хипотироидизам
Тироидната жлезда се наоѓа во вратот и ослободува хормони кои го контролираат метаболизмот. Кај хипотироидизам не се произведуваат доволно хормони, а симптомите кои можат да се појават се губење на тежината, запек, замор, сува кожа или опаѓање на косата.
