Дали ви е позната ситуацијата – бебето почнува силно да плаче и го задржува здивот, а таа секунда за вас трае како вечност? Токму едно такво видео на социјалните мрежи во кое расплакано бебе останува без здив ги загрижи многумина. Возрасна личност држи мало дете со отворена уста кое изгледа „замрзнато“. За момент престанува да дише.
„Вака изгледа задржувањето на здивот“, вели лекарот Фаез Аџиб, кој појаснува зошто оваа појава е релативно честа кај деца на возраст од 6 до 18 месеци.
„Тоа е нешто слично на рефлекс, обично е одговор на некое случување кое го налутило или изненадило детето. Иако е застрашувачко искуство, задржувањето на здивот обично не предизвикува долгорочна штета и нема штетни ефекти врз мозокот“, вели тој.
Според д-р Аџиб, задржувањето на здивот не се случува намерно, а епизодите обично траат околу една минута. Понекогаш бебето поради тоа може да се онесвести.
Педијатрката Бети Чои потврдува дека зборовите на овој лекар се точни.
„По една до две минути, децата се враќаат во својата нормална состојба. Задржувањето на здивот е вообичаено кај деца од 6 до 18 месеци, достигнува пик околу втората година и обично престанува по петтата година“, напоменува таа.
Што да се направи за време на нападот?
Не постојат универзални инструкции за тоа што е најдобро да се прави за време на нападот – секое дете е различно. Корисно е да се обидете да го прекинете нападот уште во првата фаза со пренасочување на вниманието кон други активности: необични движења (танцување, нежно дување во лице), музика, плескање, некое ѕвонче.
