Еритроцитите се создаваат во коскената срж која е сместена во внатрешноста на коските. За нормално создавање на црвени крвни зрнца, покрај здрава коскена срж, неопходно е железо и една посебна супстанца која поттикнува развој и размножување на клетките – еритропоетин. Потребни се и некои важни витамини (Б12, фолна киселина…), за да сложениот процес на создавање на зрело црвено крвно зрнце биде комплетен.
Кои се најчестите видови анемија?
Ги има многу видови, а настануваат по недостаток на некои од факторите кои се вклучени во сложениот процес на развој на еритроцити.
- Убедливо најчеста анемија е онаа која се појавува по недостаток на железо. Таа стручно се нарекува сидеропениска анемија, а во превод тоа е слабокрвност поради намалено вградување на железо во еритроцитите.
- Кога мембраната на еритроцитите е слаба, тогаш црвените крвни зрнца лесно пукаат (ова се нарекува хемолиза), па се појавува хемолитичка анемија.
- Ако нема доволно витамин Б12, еритроцитите стануваат големи и грди, но слабо функционални и тогаш се јавува мегалобласна анемија.
Кои се најчестите причини за овие анемии?
Неадекватната исхрана е убедливо најчестата причина за сидеропениската анемија. Ако бебето не внесува доволно железо (пред се низ месо или жолчка), еритроцитите ќе останат без доволна количина на хемоглобин. Сепак, некои деца внесуваат доволно железо, но пијат огромни количини кравјо млеко кое спречува да внесеното железо низ цревата се уфрли во крвта. Имено, во кравјото млеко постојат соли кои се врзуваат за железото во цревата и така оневозможуваат нивна апсорпција.
Некои деца имаат болест на цревата која оневозможува адекватна апсорпција на железо, но тогаш се јавуваат и други тегоби (пред се, долготраен пролив).
