Сите деца, без исклучок, понекогаш чувствуваат болка во стомакот, а причините за тоа можат да бидат многу различни. Еве како да утврдите дали се работи за нешто опасно што бара итна медицинска реакција или нешто поблаго, што може да се „излечи“ и без лекови.
Педијатарот Корнеј Ивановиќ открива дека најчеста причина за болки во стомакот кај новороденчињата и доенчињата се грчевите, кои се јавуваат кај околу 70 проценти од бебињата. За среќа, тие поминуваат сами од себе, на возраст од четири до шест месеци.
Најчести причини за болки во стомакот
Кога станува збор за постари деца, еве кои се најчестите причини за болки во стомакот.
- Запек, чии причини можат да бидат различни.
- Гастроентеритис, односно воспалителна болест на желудникот и/или тенкото црево. Цревните инфекции се многу болни, без разлика дали се вирусни (најчест е ротавирус) или бактериски.
- Болка поради одредена храна – без разлика дали детето јадело некоја намирница со лош квалитет која предизвикала дијареа, дали се прејало или имало алергиска реакција на некоја намирница.
- Труење
- Болести и здравствени состојби, како што се опструкција на цревата, воспаление на слепо црево, чир.
Кога треба да одите на лекар
Д-р Ивановиќ вели дека бебињата најчесто чувствуваат болка поради колики/грчеви, постарите деца поради запек, нешто поретки се инфекциите како ротавирус, а потоа следат некои банални дигестивни проблеми, како прејадување.
Меѓутоа, кога детето плаче и се жали дека го боли стомакот, како да знаете дали се работи за нешто посериозно, за кое е потребна посета на лекар, можеби воспаление на слепо црево?
Педијатарот објаснува дека акутната болка во стомакот која укажува на нешто посериозно може да ја препознаете по тоа што има точна локација, односно одредено место на болка.
Во повеќето случаи, децата пријавуваат дека ги боли стомакот околу папокот. Тоа е, на некој начин, добар знак. Колку болката е поодалечено од папокот, толку побрзо треба да го однесете детето на лекар, вели д-р Ивановиќ, особено ако детето пријави дека го боли стомакот од страна.
Треба да отидете на лекар и ако вашето дете чувствува болка во стомакот, која не е во пределот на папокот или ако болката трае подолго од 24 часа. Ако болката во стомакот е придружена со некој од следниве симптоми, задолжително посетете лекар:
- Потење и бледило на кожата.
- Нагло зголемување на телесната температура.
- Детето повраќа или има крв во столицата.
- Се појавува осип на кожата.
- Се јавува болка кога детето уринира.
- Детето повраќа жолта, зелена или црна содржина.
- Бебето е многу летаргично, поспано, одбива да јаде и да пие вода.
- кај момчињата, ако се појави болка во пределот на гениталиите заедно со болка во стомакот.
- Детето има стомачни болка која се јавува епизодно, а е проследена со дијареа која трае подолго од 72 часа и повраќање кое трае подолго од еден ден.
Д-р Ивановиќ истакнува дека во најголем број случаи, стомачната болка кај децата е локализирана во пределот околу папокот, нема други симптоми и не е потребна итна медицинска помош.
Меѓутоа, ако нешто ви изгледа „сомнително“ или не сте сигурни која е причината за болките во стомакот на вашето дете, најдобро е секогаш да го однесете на лекар, за да ги отфрлите сомнежите дека се работи за нешто посериозно.
