Бременоста е навистина прекрасна и посебна состојба, но и состојба во која идните мајки можат да доживеат бројни тегоби – проблеми со варењето на храната, запек, па дури и болка во стомакот, која може да се појави од сосема природни причини или да укаже на некој проблем.
Болка во стомакот за време на бременоста
Една од најчестите причини за болки во стомакот за време на бременоста е притисокот од постојано растечката матка. Како што се зголемува матката, органите на гастроинтестиналниот тракт се движат за да се направи простор за фетусот, а сето тоа влијае на варењето.
Постојат и некои други причини за болка во стомакот за време на бременоста:
- Прејадување
- Честа жиговина
- Проблеми со варењето
- Неправилна исхрана
- Токсикоза
- Запек
- Напнатост на стомачните мускули
- Влошување на некои хронични гастроинтестинални заболувања
- Алергија на некоја храна
Исто така, причина за болки во стомакот може да бидат некои бактериски или вирусни инфекции, а во тој случај болката најчесто е придружена со гадење, повраќање и треска и во тој случај веднаш треба да се оди на лекар.
Како да ја ублажите стомачната болка за време на бременоста
Првото нешто што треба да направите е да разговарате со вашиот лекар, за да ја утврдите точната причина за болката и да добиете соодветен третман, доколку е потребно. Во повеќето случаи, на трудниците им се советува да го намалат внесот на масна, димена и конзервирана храна, за да ги намалат болките во стомакот. Она што исто така може да помогне е внесувањето на варена храна и доволен внес на течности.
Исто така, лекарот може да советува земање активен јаглен, препарати со природни ензими кои ќе го подобрат варењето, чај од нане или нешто слично, но секако не треба да земате ништо од овие без претходно да се консултирате со лекар.
Иако причината за болки во стомакот за време на бременоста обично не е ништо сериозно, ако чувствувате остра болка или едноставно сте загрижени, не двоумете се да се јавите кај вашиот лекар.
