Во првите месеци, поголемиот број на бебиња подригнуваат после секој оброк. Но доколку, подригнувањето стане интензивно и зачестено, можно е бебто да има гастроезофагеален рефлукс (ГЕРБ). Најчесто овој рефлукс се јавува кај поголем процент на бебиња во првите неколку месеци по нивното раѓање.
Положбата на желудникот кај новороденчето е таква што всушност го олеснува враќањето на храната и контролата на преградата помеѓу хранопроводот и желудникот не е доволно развиена. Доколку бебето изеде повеќе од доволно, преку подригнувањето се ослободува од вишокот на храна. Преполниот желудник го попречува правилното работење на срцето и дишењето. Ако бебето повремено подргинува или поврати после оброкот, тоа не треба воопшто да ве загрижува. Но, доколку ова често се повторува и се јавува во исто време, треба веднаш да посетите лекар.
Родителите треба да знаат да разликуваат кога бебето подригнува (течење на хранат по образот) и кога повраќа (кога бебето исфрла содржина од желудникот).
Доколку бебето не напредува добро, треба да внимавате и да забележувате дали повраќањето и подригнувањето се јавуваат истовремено или дали во содржината што ќе ја поврати има крв. При тешки ситуации, храната што бебето ја повратило може да се симне низ дишните патишта или да се слие кон увото, при што доаѓа до воспаление на увото или белите дробови. За среќа, кај две третини од случаевите, ГЕРБ се губи после 6. месец на бебето, бидејќи преградата помеѓу хранопроводот и желудникот созрева.
Кај некои деца овој проблем останува и на поголема возраст, а кај 20% од возрасните контролата на преградата помеѓу желудникот и хранопорводот е сеуште слаба. Кај одредени случаеви, преградата е толку многу слаба, при што неопходна е хируршка интервенција и постои голема опасност по здравјето.
Доколку рефлуксот продолжи и во подоцнежните години, покрај тоа што треба постојано да се држите до советите за правилен начин на исхрана, воедно потребна е и терапија. Со неутрализација на желудочната киселина која се постигнува со употреба на лекови, долниот дел од желудникот се штити од нагризување.
Прекумерното повраќање и подригнување може да укаже на некаково пореметување. Од ретките случаеви постои голема опасност од враќање на желудочната киселина во хранопроводот.
ПРАВИЛНО ХРАНЕЊЕ
- Доколку кај детето се утврди слабост на преградата помеѓу желудникот и хранопроводот, треба да го храните на начин на кој подригнувањето и повраќањето би се свело на минимум.
- Пред хранењето, детето треба да биде будно најмалку 5 до 10 минути.
- Бебињата кои се хранат полузаспани, или во лежечка положба, задолжително треба да ги држите исправени после секој оброк, за да можат полесно да подригнат.
- При хранењето, секогаш држете го бебето под агол од 45 степени.
- Откако бебето ќе подригне, треба да се спушти да полежи на левата или десната страна, никако на стомак (го поттикнува подригнувањето), или на грб (ако поврати, може да вдише од исфрлената храна, што може да има озбилни здравствени последици).
- По оброкот држете го детето на своите гради, во исправена положба и свртено со стомакот кон вас, најмалку половина час. На тој начин се згрутчува млекото и шансите да поврати се минимални.
