Телото поминува низ бројни промени во текот на бременоста, а ништо поинаку не е ниту сои бубрезите, бидејќи сега филтрираат двојно повеќе од вообичаеното. Крвниот притисок се намалува за околу 10 mmHg поради прогестеронот, уринарниот тракт се шири, а урината останува подолго во телото, што го зголемува ризикот од уринарни и бубрежни инфекции.
За време на бременоста, нормално е да имате одредена количина на протеини во урината, бидејќи бубрезите сега работат толку напорно, но протеинот во урината исто така може да укаже на инфекција. Излачувањето на протеини во урината се зголемува за време на бременоста, но се смета за нормално до вредност од 300 мг.
Затоа лекарите понекогаш наложуваат уринарен тест, а во случаи кога има протеини и бактерии во урината, се препишуваат антибиотици кои се безбедни за употреба во текот на бременоста.
Треба да се има на ум дека тестирањето за протеинурија (присуство на протеини во урината) е рутински тест кој релативно често се прави за време на бременоста. Вредноста на протеинот во урината може да се одреди како негативна, што значи дека нема протеин во урината или позитивна, што значи дека има протеин во урината.
Во зависност од протеинуријата, вашиот лекар може да препорача почести прегледи за да се следи дали протеинот во урината се зголемува.
Треба да бидете многу повнимателни ако протеинуријата се појави во втората половина од бременоста, бидејќи тоа може да биде знак дека се развива прееклампсија. Прееклампсијата предизвикува зголемување на крвниот притисок, што влијае на функцијата на бубрезите.
Бубрезите може да не работат правилно, а протеините кои вообичаено треба да останат во крвта, бидејќи тие се големи молекули и не минуваат низ бубрежниот филтер, потоа преминуваат во урината.
Доколку се утврди високо ниво на протеини во урината и покачен крвен притисок, внимателно се следи состојбата на трудницата, а обично се прават тестови на крвта за да се проверат факторите на згрутчување на крвта и тестови кои покажуваат функција на црниот дроб и бубрезите.
Во зависност од состојбата на трудницата, потоа се прави план како ќе се води бременоста во наредните денови или недели.
Знаци на прееклампсија кои се јавуваат во втората половина од бременоста се:
- Проблеми со видот
- Ненадејно отекување на рацете, стапалата или лицето
- Главоболка придружена со повраќање
- Болка под ребрата.
Овие знаци може да се појават многу брзо, па затоа е важно веднаш да се јавите кај вашиот лекар доколку ги почувствувате.
