Притисокот на врсниците може да поттикнат раст или да има штетни ефекти кај децата. Во секој од овие случаи, родителите можат да им помогнат на децата да се справат со притисокот на различни начини. Психотерапевтот Шон Гровер за Psychology Today открива што точно е притисок од врсници и како родителите можат да им помогнат на децата да се справат со тоа на позитивен начин.
„Притисокот од врсниците се однесува на влијанието што го чувствуваме од другите да се однесуваме, размислуваме или дејствуваме на одреден начин. Тоа е универзално искуство, но може да биде особено интензивно кај децата и тинејџерите“, истакнува Гровер, додавајќи: „Како што растат, потребата за прифаќање од нивните врсници им станува многу важна, што често може да дојде во конфликт со нивните вредности“.
Психотерапевтот додава дека притисокот може да има и позитивни и негативни ефекти. Позитивната страна е тоа што може да ги поттикне децата да испробуваат нови активности, подобро да напредуваат на училиште и да усвојат поздрави навики. Од друга страна, тоа може да доведе до малтретирање, ризично однесување и молчење во ситуации во кои треба да се реагира, пренесува Psychology Today.
Гровер издвојува и три корисни совети за тоа како родителите можат да им помогнат на децата.
- Споделете ги вашите сопствени приказни
Децата се поврзуваат со лични приказни, особено кога доаѓаат од луѓе на кои им веруваат. „Споделете моменти кога сте се соочиле со притисок од врсниците, без разлика дали сте застанале во одбрана на некој што бил исклучен или сте се спротивставиле на нагонот да ја следите групата. Раскажете како сте се чувствувале, што сте направиле и што сте научиле“, советува психотерапевтот.
- Разгледајте ги добрите и лошите страни
Помогнете му на вашето дете да размисли за позитивните и негативните страни на притисокот од врсниците. Обидете се да го прашате за ситуации каде што пријателите го поттикнувале на нешто позитивно, како што е испробување нова активност или дополнителен труд на тест. Потоа поттикнете ги да зборуваат за моменти кога се чувствувале под притисок да направат нешто што не е во согласност со нивните вредности. Ваквиот начин на размислување често развива самосвест, што е клучно за одбивање на негативни влијанија.
- Обидете се да играте различни улоги со нив
Децата понекогаш попуштаат под притисокот од врсниците, едноставно затоа што не знаат да кажат „не“. Играњето улоги може да им помогне да вежбаат одговори на вообичаени ситуации, како што е одбивање покана да се направи нешто ризично или застанување во одбрана на пријател кој е жртва на нефер однесување.
Научете ги едноставни, но јасни фрази како: „Тоа не ме интересира“, „Зошто да не пробаме нешто друго?“ или „Мислам дека тоа не е фер“, за да знаат да се заземат за себе.
