Децата главно едвај ја чекаат Новата година, сè за празниците им е возбудливо и забавно, но родителите треба да бидат внимателни. Педијатарот д-р Јана Тимина открива кои три вообичаени опасности ги демнат најмалите за време на новогодишните празници – не се причина за страв, но треба да бидете внимателни.
Прејадување или труење со храна
Кај нас сите празници најчесто се прославуваат со обилна храна и семејни дружења, што создава посебна атмосфера, но треба да се има мерка кога е храната во прашање. За да го спречите детето да се прејади за време на празниците, пред тој планиран, обилен семеен оброк, дајте му јогурт или овошје како ужина, советува педијатарката. Имајте на ум дека ако детето е многу гладно пред оброк, потешко ќе го препознае сигналот дека е сито и ќе има и поголеми шанси да се прејаде.
Потсетете го детето дека не мора да изеде се што е во чинијата и помогнете му да се одбрани од оние кои го притискаат да „земе уште едно парче“ од што и да е. Објаснете му дека е сосема во ред да одбие нешто или да го остави за подоцна.
„Сите намирници и оброци што ги јадат децата треба да бидат свежи. Не им давајте салата од вчера бидејќи стомакот на малите е многу почувствителен на такви работи“, предупредува д-р Тимина, наведувајќи дека главни симптоми на труење со храна се повраќање, дијареа, треска и стомачни болки.
Во случај на труење со храна, главен ризик е дехидрацијата, која се случува побрзо и е посериозна кај децата, па затоа е неопходно да се дава почесто вода на децата, за да се избегне тоа.
Доколку ги забележите следните знаци на дехидрација, задолжително посетете лекар:
- Сува уста или јазик
- Плачење без солзи
- „Воспалени“ очи
- Маласалост
- Раздразливост
- Недостаток на енергија, летаргија
- Малку урина при мокрење
- Бледа кожа
- Ладни раце и нозе
- Брзо или плитко дишење
Алергиски реакции
Во зима, кога воздухот во просториите е обично многу сув, тоа влијае на надворешниот, заштитен слој на кожата. Кај децата со атопичен дерматитис, оваа состојба може да се влоши ако за кожата не се грижи правилно. Исто така, појавата на симптомите на атопичен дерматитис може да биде предизвикана од „псевдоалергени“ – голем број мандарини и други агруми, чоколадо, чадена храна, производи со алергени, адитиви за вкус, бои и конзерванси, кои најмногу ги има на трпезата или во храната што ја јадеме за новогодишните празници.
Педијатарката истанува дека овие производи содржат супстанции на кои телото може да изреагира, давајќи симптоми слични на алергија, но дека реакцијата, за разлика од алергиската, зависи од количината – доколку се изеде мала количина од овие намирници не доаѓа до реакција, ниту во тој случај имуниот систем се бори против овие намирници.
Понекогаш дури и децата кои немаат алергии може да доживеат сериозна алергиска реакција на некоја нова намирница од празничната трпеза – некои слатки, јаткасти плодови… Осип, отекување на лицето, очните капаци, рацете, ушите, кивање, солзење на очите, кашлица , може да бидат симптоми на алергија на храна, па доколку ги забележите, задолжително веднаш контактирајте лекар.
Респираторни заболувања
Зимата е периодот кога има повеќе вируси – грип, акутни респираторни вирусни инфекции, пневмонија… Покрај тоа што повеќето луѓе во зима поминуваат повеќе време во затворени простории, по правило, воздухот внатре е и посув, што доведува до сушење на носната слузница и го олеснува навлегувањето на вирусите во телото.
Пневмонијата може да биде опасна за децата, а кога станува збор за акутните респираторни вирусни инфекции, д-р Тимин вели дека тие генерално не се опасни, но има некои знаци кои можат да укажуваат дека состојбата се влошува.
„Прво, висока температура, над 38,5 степени, температура која се зголемува на секои три до четири часа и тешко се спушта. Второ, кашлица која е многу присутна и дење и ноќе. Исто така, намален апетит, летаргија, поспаност на дете кога ќе ги забележите овие знаци, најдобро е веднаш да се обратите на лекар, за да се утврди или исклучи пневмонијата“, вели докторката.
Затоа, внимавајте што и колку јаде вашето дете за време на празниците, редовно проветрувајте ги собите, потсетувајте ги децата редовно да ги мијат рацете, за да ги избегнете овие несакани ситуации за време на празниците.
