Познато е дека кај аутизмот е важно што побрзо да се препознаат сигналите за да се преземат навремени терапии и сите вежби кои можат да му помогнат на детето да развие одредени вештини и да биде посамостојно, но проблемот е што аутизмот е многу тешко да се препознае на рана возраст.
За жал, современите родители се повеќе се соочуваат со дијагноза на АСД (ASD – Autism Spectrum Disorder) – нарушување од спектарот на аутизам. Саша Бочарников, клинички психолог од Русија, објаснува на кои знаци треба да внимаваат мајките и татковците додека детето е сè уште бебе.
Причините за аутизмот се уште се проучуваат и не е сигурно кои се можните предизвикувачи, а се припишуваат различни состојби како генетика, консумација на лекови, бременост итн. Обично родителите ги забележуваат првите знаци околу 3-годишна возраст – не обрнуваат внимание се додека однесувањето на детето не почне упадливо да се разликува од однесувањето на другите деца.
Клиничкиот психолог Бочарников истакнува дека овие 4 црвени знаменца на аутизмот може да се забележат кај децата пред една година:
- Недостаток на контакт со очите
- Детето не реагира и не се врти на неговото име кога ќе го повикате
- Недостаток на потреба од топол емотивен контакт со родителите
- Карактеристики во сетилната сфера: детето сака да јаде само одредена храна, чувствително е на бучава, облека, не сака да го допираат
Експертот истакнува дека е невозможно целосно да се излечат нарушувањата од спектарот на аутизмот, терапијата е насочена кон ублажување на симптомите кои го попречуваат секојдневниот живот. Но, во исто време, луѓето со АСД имаат одредени предности и таленти.
„На пример, луѓето со АСД можат детално да проучуваат предмет, долго да паметат информации, бидејќи ги перцепираат и со визуелни и со аудитивни анализатори“, вели Бочарников. „Таквите луѓе имаат одлични способности во математиката, науката, музиката и уметноста“.
