Набљудувањето на бебето како расте и се развива е навистина посебно искуство и подарок за уживање во првата насмевка, првиот збор, првиот чекор… Можеби најинтензивниот развој се случува во првата година од животот на бебето, а во тој период детето поминува низ многу пресвртници во развојот, а родителите навистина мора внимателно да следат сè што прави бебето, за да забележат какви било отстапувања.
Експертите за педијатриска физика и окупациона терапија ptotkids.com издвојуваат пет алармантни знаци кои укажуваат на потенцијални проблеми во развојот во првата година.
1. Ограничени физички движења или вкочанетост (од првиот до третиот месец)
Во првите неколку месеци бебето постепено станува поактивно, послободно ги движи рацете и нозете. Ако забележите дека неговите движења се ограничени или дека постои вкочанетост на рацете или нозете, побарајте совет од специјалист, бидејќи тоа може да укажува на проблеми со мускулниот тонус или моторниот развој.
2. Отсуство на реакција на визуелен или аудио стимул (од три до шест месеци)
До оваа возраст, бебето треба да биде повнимателно, да ја врти главата кон изворот на звук и да ги следи предметите со очите. Отсуството на реакција на звук или визуелен стимул може да укаже дека нешто не е во ред и тоа не мора да е поврзано со видот или слухот, туку со реакцијата на надворешниот свет.
3. Проблеми во одржување на тежината на своето тело (од шест до девет месеци)
Како што бебињата се приближуваат до својот прв роденден, тие ќе почнат да експериментираат со одржување на нивната тежина додека стојат – се разбира со ваша помош. Ако детето покажува потешкотии во тоа и делува дека не може да ја држи својата тежина на нозете, разговарајте со специјалист.
4. Отсуство на ползење или одржување на тежина со раце (од девет до 12 месеци)
До деветтиот месец, многу бебиња веќе се во движење – лазат и полека се креваат со рацете. Доцнењето на овие активности, како што е бебето да не може да ја издржи својата тежина на рацете кога е во положба на четири нозе или воопшто да не се обидува да ползи, е знак дека причината треба подетално да се истражи.
5. Невообичаени положби или фаворизирање на една страна (во текот на првата година)
Бебињата развиваат свои уникатни движења, но ако постојано заземаат необични пози или ја користат едната страна од телото значително повеќе, треба да обрнете внимание на ова – на пример, ако бебето постојано ја врти главата на едната страна или многу ја користи едната рака во однос на другата.
Препознавањето на некој од овие знаци кај детето не треба да ве плаши, туку треба да биде сигнал за да побарате мислење од стручно лице, за навреме да утврдите дали има проблем – што воопшто не мора да биде случај, бидејќи секое дете има свое темпо и пат на развој.
Меѓутоа, доколку проблемот постои, раното препознавање и поддршка од експерти може да направи значителна разлика во понатамошниот развој и раст на детето.
