Ненаспиеноста и исцрпеноста се последици од честото будење или лошото спиење на нашите малечки. За да ја поправите оваа ситуација, ви претставуваме шест главни причини, како и начини како вашето дете да се разбуди наспиено и задоволно!
1. Се уште е мало
Многу малку бебиња спијат цела ноќ од раѓање. Во првите два месеци, бебињата често се будат и заспиваат, а спијат помеѓу 12 и 18 часа дневно. Повеќето од нив можат да ја преспијат ноќта кога ќе наполнат девет месеци, иако тоа значи само пет-шест часа во континуитет.
2. Премногу му помагате
Ако долго го успивате детето, тоа нема да научи само да заспива, туку ќе плаче по оној што му помага – вас. Ставете го на спиење кога е поспано, но сè уште не заспало, и ќе научи само да заспива.
3. Преуморно е
На децата од градинка и од предучилишна возраст им требаат помеѓу 11 и 14 часа сон дневно, вклучително и попладневните дремки. Рутината е клучна, затоа одредете точно време за одење во кревет, будење, дремење, јадење и играње.
4. Страв од одвојување
Нормално е сите деца да поминат низ оваа фаза. Обидете се да не го охрабрувате со дополнително зборување, пеење, нишање или хранење. Кога ќе наполни околу шест месеци, можете да му помогнете на вашето дете да заспие само така што нежно че му зборувате и ќе го галите. Бидете покрај него и утешете го, но не го земајте и не го хранете само за да го утешите.
5. Недостаток на рутина
Повторувањето на истите работи секој ден пред спиење му помага на детето да разбере дека е време за спиење. Рутината е многу важна. На пример, можете да го искапете детето, да го нахраните, да му прочитате една или повеќе приказни, а потоа да му посакате добра ноќ. Неопходно е да започнете таква рутина што е можно порано.
6. Одложување на одењето на спиење
Повеќето деца не сакаат да спијат бидејќи ги интересира се што се случува околу нив, па се плашат да не пропуштат нешто. Ќе ве замолат да им читате повеќе приказни, ќе речат дека се гладни или жедни, ќе треба да одат во тоалет. Бидете нежни, но одлучни. Секогаш кога вашето дете ќе ве повика, останете со него што е можно помалку време за да разбере дека навистина е време за спиење.
