Секоја мала работа што ќе ја направи родител може да има влијание врз животот на детето. И колку и да се трудиме тоа влијание да биде позитивно, понекогаш нешто ќе не исфрли од колосек и ќе ни ги расипе плановите. Сите родители прават грешки додека ги воспитуваат своите деца. Но, не секој е подготвен да ги увиди грешките, да ги признае и да работи на себе во иднина. Исто така, признавањето на грешките може да им помогне на родителите да ги поправат за да не им нанесат трајна штета на децата во иднина.
Кои се грешките што родителите не би смееле да ги прават?
Угодување на сите потреби на детето
Една од најчестите родителски грешки е да му се сервира сè на детето и да му се оствари. И додека вие се топите затоа што можете да му дадете сè што ќе посака, долгорочно само ќе го направите несреќно и тврдоглаво затоа што нема да научи да прави ништо за себе, а тоа не е одржливо на долг рок. И секое одбивање да му направите нешто што сте го правеле порано, само ќе му наштети на детето.
Споредба со другите
Споредбата со врсниците, пријателите, браќата и сестрите… родителите дури и ако знаат дека тоа не е во ред, често паѓаат во замката на споредба. Ова може да поттикне чувство на огорченост и љубомора, потенцијално да ги оштети односите на детето и да наметне нереални очекувања кои можеби нема да се исполнат. Охрабрувањето на вашето дете постојано да се натпреварува со другите е нездраво и најверојатно ќе резултира со разочарување и за него и за вас.
Непосветување внимание
Често се жалиме на тоа како времето лета, но се чини дека во исто време не сме свесни за тоа. Дозволуваме мобилните телефони, компјутерите, е-поштата и телефонските повици да се мешаат во драгоцените моменти што треба да ги поминуваме со нашите деца. Времето е една од оние работи кои никогаш не можеме да ги вратиме и затоа треба добро да го искористиме, тоа некако многумина сè уште не го прават.
Очекување на совршенство
Родителите често не сакаат да признаат дека очекуваат совршенство од своите деца, а не се ни свесни за тоа. Запишуваат дете на некој спорт, а веќе на вториот тренинг замислуваат дека се натпреварува на Олимписки игри, иако тоа не сакаат никому да го признаат. Гледаат талент во се и очекуваат пробив. Ваквите очекувања, дури и да не се кажат гласно, доведуваат до разочарување. Оставете ги децата да грешат и да не бидат најдобри, бидејќи во спротивно ќе се повлечат и ќе се плашат да започнат нешто ново.
Давање лош пример
Децата ги забележуваат и имитираат навиките на нивните родители. Бидете свесни дека вие сте модел кој тие ќе го копираат. Ако пцуете, викате и слично, немојте да се изненадите ако вашето дете почне да пцуе, вџашени прашувајќи го „каде го слушна тоа“ и „од кој лош пријател научи такви изрази“.
Недостапност
Среде бројните обврски, родителите понекогаш ненамерно може да ја занемарат важноста да им посветат време на своите деца. Инвестирањето во квалитетно време со вашето дете не само што создава посилна врска, туку и ја пренесува вашата љубов кон него. Потрудете се да се поврзете со детето, слушајте ги неговите искуства и чувства наместо да брзате да му дадете решенија или веднаш да ги решите неговите проблеми.
Прекумерна контрола
Како што растат децата, тие сакаат да ги истражуваат и откриваат луѓето и работите околу нив без ваше мешање и контрола. Дајте му на вашето дете слобода да формира своја перспектива. Можеби се плашите дека ќе го изгубите вашето дете во тој процес, но тоа нема да се случи. Всушност, колку повеќе го контролирате вашето дете, толку е помала веројатноста да се поврзете. Нека бидат оставени сами на себе. Ќе се поколебаат, но на крајот ќе научат да се справуваат со работите со сопствено темпо.
