Родителите го дочекуваат бебето со многу радост и љубов, но новороденчињата не доаѓаат со „упатство за употреба“, поради што на мајките и татковците им треба малку време да се навикнат на новото секојдневие.
Многу работи родителите ги прават инстинктивно, но воспоставувањето навики за спиење кај бебето не е нешто што природно знаете како да го правите. Токму тука мајките и татковците често од почеток прават грешки, поради кои бебето полошо спие, но експертите имаат совети како да ги избегнете овие грешки.
Го учат бебето да заспие нишајќи го
Нишањето и пеењето на бебето може да биде еден од брзите и ефикасни начини за заспивање на бебето, но од друга страна, може да има негативен ефект во смисла дека детето станува зависно од родителите за да заспие. Педијатарот д-р Џина Сонг вели дека бебињата треба да научат сами да се смируваат и да заспијат.
„Ако мама секогаш го лула бебето додека не заспие во нејзините раце, бебето секогаш ќе се потпира на мама за тоа“, вели таа. Потоа, кога вашето малечко ќе се разбуди среде ноќ, ќе плаче додека не го земете. Затоа Американската академија за педијатрија ги советува родителите да го стават бебето во креветчето кога е поспано, но се уште не е целосно заспано.
Сепак, имајте на ум дека сите бебиња се различни и ако успивањето со нишање му годи и на бебето и вам, само така продолжете!
Го земаат бебето штом се огласи
Експертите велат дека е важно родителите да реагираат на плачот на бебето, но педијатарот д-р Сонг вели дека „не е неопходно“ да се земе бебето штом заплаче во текот на ноќта.
„Ако бебето прави некои звуци и се врти, во ред е да се почека и да се види што ќе се случи. Понекогаш децата така учат да се смируваат и продолжуваат да спијат“.
Затоа, почекајте да видите дали бебето ќе продолжи да спие, а ако почне да плаче и ви се чини дека не може да заспие без ваша помош, земете го.
Вклучуваат и исклучуваат ноќно светло
Само по себе не е лошо да имате ноќно светло во просторијата каде што спие бебето, но проблем е ако го вклучувате и исклучувате.
„Собата на бебето треба да изгледа исто кога ќе заспие и доколку се разбуди во два часот наутро“, вели д-р Линел Шниберг, клинички психолог со сертификат за медицина на спиење.
Имаат нереални очекувања
Педијатарот д-р Џина Поснер вели дека многу родители очекуваат бебе од 12 недели да спие цела ноќ. Да, некои родители имаат среќа навистина така и да биде, но тоа не е правило и „не е разумно да се очекува такво нешто“.
„Околу шестиот месец, можете да очекувате повеќето бебиња да спијат поголемиот дел од ноќта“, вели д-р Поснер, охрабрувајќи ги родителите да имаат реални очекувања.
Предоцна ги ставаат бебињата во кревет
„Вистинското“ време за спиење на бебето зависи од неговиот распоред и потреби, но не е паметно да чекате малечкото да биде премногу поспано пред да го заспиете бидејќи тоа може да ви се одбие од глава.
„Бебето ќе биде премногу исцрпено за да се смири и да заспие“, вели д-р Сонг, а д-р Поснер советува да обрнете внимание на знаците дека бебето е поспано – триење на очите и зевање – и тогаш да го ставите на спиење.
Не се доследни во рутината за спиење
Тоа што секоја вечер ќе имате различни „ритуали“ пред спиење го исфрла бебето од ритам. На бебињата им требаат јасни сигнали дека е време за спиење, а тоа прво ќе го постигнете правејќи ги истите работи секоја вечер пред да го ставите бебето во кревет.
Рутината може да изгледа како што вам ви одговара, но д-р Шниберг советува тоа да биде бањање, облекување пижами, хранење, а потоа читање приказна или пеење песна пред да го ставите бебето во креветчето.
Го пуштаат детето да заспие каде било
Се случува понекогаш да не сте дома кога бебето треба да спие, но доктор Шниберг вели дека е многу важно бебето секогаш да спие во креветче бидејќи таму најдобро ќе спие и најбрзо ќе заспие.
„Се препорачува времето и местото на спиење да бидат исти. Доколку сте доследни на ова, детето ќе има добри навики и распоред за спиење“.
Го оставаат бебето да спие „цел ден“
Потребите за спиење на бебињата се менуваат во зависност од нивната возраст, но грешката што ја прават многу родители е да го остават своето дете да спие предолго во текот на денот, а со тоа да го наруши неговиот ноќен сон. Понекогаш треба да го разбудите бебето ако спие премногу во текот на денот, за да не го нарушите распоредот на ноќниот сон, вели д-р Поснер и советува времето кога бебето е будно да го пополните со игри и приказни за да се умори до следното спиење, поради што ќе спие подобро.
