Чувствителните деца, како што и кажува самото име, се многу почувствителни на луѓето и ситуациите околу себе. Ако мислите дека вашето дете би можело да биде многу чувствително, проверете ги овие девет показатели, карактеристични за нивното однесување.
- Многу емотивно реагираат
Чувствителните деца речиси на се ќе реагираат многу емотивно. Најобична ситуација, како одење во продавница за миленичиња, може да поттикне емотивна реакција поради животните во продавницата. Овие деца се со многу нежно срце, поради што често ќе сочувствуваат со другите околу нив.
Поради емпатијата и самите ќе се чувствуваат тажни ако другите околу нив се тажни и ќе дадат се од себе да им помогнат на оние на кои им е потребна. Можеби понекогаш ќе мислите дека премногу се грижат за другите и дека сакаат да ги поправаат туѓите проблеми.
Често размислуваат за неуспех
Многу чувствителните деца размислуваат за длабочината на проблемот многу почесто од нивните врсници. За чувствителните деца, лошата оценка во училиште или лошиот цртеж нема да биде само тоа, туку ќе ги натера да се запрашаат зошто порано не ја сфатиле својата грешка. Овој вид на размислување може да резултира со стрес и анксиозност на долг рок.
- Сè околу себе сфаќаат лично
Ако вашето дете е чувствително, често ќе се случува да се што се случува го сфаќа премногу лично. Дури и ако нешто не се однесува на нив, тие првично ќе помислат дека сè што е кажано е насочено кон нив и дека тоа важи за нивното однесување. Затоа на родителите им се советува да не ги споредуваат чувствителните деца со други. Споредбите би можеле да им значат дека очекувате повеќе од нив, што ќе ги натера да претераат затоа што ќе сакаат да ве импресионираат.
- Тешко носат одлуки
Заедничка особина на многу чувствителните деца е тешкото донесување одлуки. Се додека не разгледаат разни детали и можности, нема да можат да донесат одлука. Дури и во наједноставните ситуации, понекогаш ќе биде тешко да се одлучат, на пример, кој вкус на сладолед да се избере или кого сакаат за партнер во друштвена игра.
- Се чувствуваат виновни
Ако децата се чувствуваат како да донеле погрешна одлука, тие ќе се чувствуваат крајно виновни. Премногу ќе размислуваат за причините што довеле до таа одлука и што и да им кажете, нема да престанат да размислуваат за грешката додека не се помират со неа.
- Добро ги читаат луѓето
Чувствителните деца имаат силно чувство за набљудување и читање на луѓето. Ги набљудуваат карактерните црти на луѓето околу нив и врз основа на она што го гледаат одлучуваат каква личност се тие.
- Сакаат животни
Децата кои се чувствителни често развиваат посебна врска со животните на кои целосно им веруваат. Тие ги гледаат животните како вистински пријатели и, колку што можат, ќе се погрижат да се задоволат сите потреби на животните.
- Чувствуваат одговорност и ги признаваат своите грешки
Ваквите деца постојано се оценуваат себеси, а доколку згрешат ќе признаат и ќе анализираат зошто дошло до грешката. Тие ги држат своите емоции под контрола колку што можат, но понекогаш се распаѓаат и се чувствуваат подобро откако ќе заплачат или ќе се доверат на блиска личност.
- Многу размислуваат за сè што прават
Чувствителните деца размислуваат многу и посветуваат големо внимание на се. Многу родители ќе се согласат дека премногу размислуваат дури и за тривијални работи. За да добијат одговори, ќе поставуваат многу прашања и ќе се грижат за туѓите чувства. Се смета дека размислуваат надвор од нивните години, што понекогаш доведува до тоа да се чувствуваат погрешно разбрани од оние околу нив.
