◊◊◊◊◊◊◊
Усвојувањето на говорот е природен процес, исто како и трчањето. Децата не мора да ја тренираат оваа вештина, туку лесно самите учат да зборуваат. Ако детето расте во здрава средина, нема да има никакви потешкотии да го научи својот мајчин јазик. Но, каква улога имаат возрасните во овој процес?
Имено, ако сакате вашето дете да прозбори брзо, треба да разговарате со него колку што е можно почесто.
Конверзацијата со бебињата може позитивно да влијае врз развојот на говорот и разбирањето кај децата, без оглед на социо-економскиот статус на родителите
За детето да научи да зборува, важно е родителот да разговара со него уште од најрана возраст, без оглед на тоа што тогаш веројатно и не ве разбира што му зборувате. Читајте му или пејте му, а активностите како цртање, шетање или готвење, вербализирајте ги за да може додека ве гледа и слуша да учи и да „разговара“.
„Начинот на кој се обраќаме кон децата е важен“, се вели во студија објавена во списанието Neuroscience.
Родителите имаат најголемо влијание врз говорот на децата кога зборуваат со своите деца задоволно и спонтано и се интересираат за нивните теми.
Што, всушност, откриле научниците?
Научниците од универзитетите Масачусетс и Харвард објаснуваат дека конверзацијата со бебињата може позитивно да влијае врз развојот на говорот и разбирањето кај децата – без оглед на социо-економскиот статус на родителите.
„Дојдовме до сознанија дека најважната компонента во развојот на говорот кај детето е количината на комуникација со повратни информации, а не бројот на зборови кои ги слушаат“, изјавил предводникот на студијата Рејчел Ромео, објаснувајќи дека конверзацијата создава силни врски во мозокот.
Треба да се има на ум дека не е важно само да му се зборува на детето, туку и да се вклучи во комуникацијата, за да покрај развојот на говорот, детето усвои нов вокабулар и динамика на комуникацијата. Според ова истражување, дете кое расте во такви околности, има поголеми шанси да биде социјално и емоционално развиено, научено на слушање, набљудување, интеракција и имитација. Затоа родители, зборувајте и комуницирајте што повеќе со своите деца.
