Ако вашето дете е фасцинирано од читање книги, цртање, собирање сликички или правење макети, тоа е показател дека развива хоби. Можеби ви се чини дека на детето му треба повеќе одмор и игра после училишните обврски, но хобито не е само за исполнување на слободното време и забава. Имено, експертите за детски развој се согласуваат дека децата навистина имаат корист од занимавањето со хоби бидејќи овој вид на активност може да помогне во целокупниот развој на детето.
Помагаат во справување стресот
Занимавањето со хоби нуди релаксација на умот и телото. Децата денес се под постојан притисок – притисок да ги исполнат очекувањата, да постигнат резултати и цели, да се истакнат. Хоби кое ги интересира и ги релаксира и им го подигнува расположението, им нуди совршено “бегство“ од грижите, стресот и преоптоварениот секојдневен живот. Исто така, децата имаат високо ниво на енергија што треба да се канализира во нешто корисно, а хобито е како совршено за ова.
Поттикнуваат и креативност
Повеќето хобија го искористуваат креативниот потенцијал на детето. Ги поттикнуваат децата да ја користат својата имагинација и ја поддржуваат слободата на изразување, каде што создаваат нешто уникатно, нешто што е нивно и што подоцна можат да го споделат со другите. Детето ги развива своите креативни идеи кога пишува песни или приказни, црта, слика, свири музика или прави нешто со рацете, како што е моделирање глина или керамика. Дури и едноставното хоби како собирање монети или поштенски марки бара креативност во прикажувањето на колекцијата.
Ги подобрува когнитивните вештини
Хобијата им овозможуваат на децата подобро да се фокусираат и да се концентрираат. Користејќи хоби, тие ги развиваат своите способности за расудување, анализа и решавање проблеми. Некои хобија бараат и трпение, а бидејќи детето е страсно за своето хоби, тоа е повеќе подготвено да вложи напори да ги надмине сите предизвици. На пример, читањето книга бара време, трпение, концентрација и фокус.
Добри се за физичкото здравје
Хобијата кои бараат од децата да поминуваат време надвор ги прават физички поздрави и посилни. Во денешно време кога децата поминуваат многу време затворени во своите домови и пред екрани, хобијата како што се спортови на отворено, планинарење, градинарство, набљудување и хранење птици, обезбедуваат децата да бидат доволно изложени на сончева светлина и свеж воздух.
Помагаат во градењето на социјални вештини и го шират кругот на пријатели
Активностите во кои децата треба да комуницираат со другите ги градат нивните социјални вештини. Хоби кое вклучува патување, екскурзии и кампување му помагаат на детето да се прилагоди на животот во колективи и групи. Учеството во хоби групи и интеракцијата со луѓе кои имаат слично хоби, исто така, ги подобрува комуникациските вештини и помага да се дружат и да се прошири кругот на пријатели со исти интереси. Кога се занимава со спорт, детето ќе научи и добар спортски дух, фер игра и како да биде тимски играч.
