Ковид-19 пандемијата е тесно поврзана со „алармантно“ зголемување на дебелината кај децата и тинејџерите во САД, со тежина кај обезните деца двојно зголемена за време на пандемијата, открива нова студија.
Истражувачите од Американскиот центар за контрола и превенција на болести (ЦДЦ) прегледале 432.302 деца на возраст од 2 до 19 години.
Откриле дека уделот на обезни деца во САД се зголемил од 19 проценти на 22 проценти од август 2020 година до август 2021 година – што е зголемување од 15 проценти. Кај тешко обезните деца, очекуваното зголемување на телесната тежина е речиси двојно.
Студијата нагласува едно од многуте долгорочни прашања што може да се појават во екот на пандемијата со Ковид-19, и нешто за што здравствените службеници ќе треба да се грижат понатаму во пост-Ковид-светот.
- Децата, без разлика дали се со прекумерна тежина или не, добиваат повеќе тежина од вообичаено
Пред пандемијата, децата кои имале здрава тежина, просечно добивале околу 1,5 килограми годишно. Тоа се зголемило на 2,4 килограми за време на пандемијата.
За децата кои биле умерено дебели, очекуваното зголемување на телесната тежина се зголемило од околу 3 килограми годишно пред пандемијата на 5,4 килограми по почетокот на пандемијата.
Стапката на дебелина е најдраматично зголемена кај децата на возраст од 6 до 11 години, кои се повеќе зависни од своите родители и може да биле повеќе погодени кога училиштата ги прекинаа часовите со физичко присуство, велат истражувачите.
Д-р Алисон Гудман, епидемиолог и педијатар во ЦДЦ, го опиша трендот како „алармантен“.
Тоа е исто така знак за маѓепсан круг. Се чини дека пандемијата ја влошува долгогодишната епидемија на дебелина во нацијата, а обезноста може да ги стави луѓето во ризик за потешки болести по инфекцијата со коронавирус.
Новата студија на ЦДЦ открива дека кај децата на возраст од пет години или помлади кои веќе биле сериозно дебели пред пандемијата, индексот на телесна маса (БМИ) им се зголемил во просек од 24 на 26. Најлоша група биле сериозно обезни деца на возраст од шест до 11 години, чиј БМИ во просек скокнал од 26 на 31 за време на пандемијата.
Дебелината во детската возраст може да ја отвори вратата за различни здравствени проблеми сега и во понатамошниот живот. Децата со прекумерна тежина се со поголема веројатност да бидат дебели како возрасни и да развијат висок крвен притисок, дијабетес тип 2 или да имаат проблеми со зглобовите. Тие исто така може да развијат психолошки проблеми како што се пониска самодоверба, анксиозност и депресија. (Дејли мејл)
