УНЕСКО, УНИЦЕФ и Светската банка повикаа во борбата против коронавирусот, училиштата ширум светот да се остават отворени, стои во извештајот објавен вчера во кој се истакнува штетата што ја предизвикува затворањето на образовните установи, особено во сиромашните земји.
“Клучно е да се даде приоритет на повторно отворање на училиштата и да се организираат неопходните часови со цел да се надомести градивото за оние ученици чии училишта беа затворени“, вели во соопштението, Роберт Џенкинс, раководител на одделот за образование на УНИЦЕФ.
“Не треба да одиме далеку за да ја видиме големата штета што ја предизвика пандемијата на учењето на децата во целиот свет. Во земјите со низок и среден доход, тој разорувачки ефект е зголемен, бидејќи постои ограничен пристап на учењето на далечина, зголемен ризик од кратење на буџетот и доцнење во плановите за повторно отворање“, нагласува тој.
Според Џенкинс, сето ова ја осуети секоја шанса за нормалност за учениците.
Според извештајот на овие три институции, децата од сиромашните земји изгубиле речиси четири месеци образование од почетокот на пандемијата. Во богатите земји, каде може да учествуваат во учење на далечина, изгубиле шест недели, се појаснува во документот.
УНЕСКО и Светската банка сметаат дека е клучно веднаш да се вложи во образовните системи за да се намали се поширокиот јаз кој се создава помеѓу оние имаат обезбедно школување во богатите земји и оние во сиромашните.
Извештајот на трите институции е направен врз основа на информации од речиси 150 земји собрани помеѓу јуни и октомври.
