Апгар-тестот се прави веднаш по раѓањето за да се провери колку брзо и успешно бебето се приспособува на животот надвор од матката. Овој тест не е дијагноза, туку моментална проценка која му помага на медицинскиот тим да утврди дали на новороденчето му е потребна дополнителна нега.
Методата е развиена во 1952 година од анестезиологот Вирџинија Апгар и денес се користи во сите современи родилишта.
Појавата на пониски резултати е почеста кај бебиња родени со царски рез, предвремено родени бебиња, по ризична бременост или породување со компликации
Како се спроведува Апгар–тестот?
Се проверуваат пет параметри, секој оценет со 0, 1 или 2 поени:
- боја на кожата,
- дишење,
- мускулен тонус,
- реакција на дразба,
- срцева акција.
Максималниот резултат е 10 поени, а проценката се прави два пати:
- по првата минута од раѓањето и
- пет минути подоцна.
Првата оценка често е пониска – особено кај предвремено родени бебиња или кај оние родени со царски рез.
Што значат резултатите?
- 8 до 10 поени – нормален резултат кај здрави новороденчиња,
- 7 поени или помалку – потребна е медицинска поддршка,
- под 6 поени – бара итна интервенција, како чистење на дишните патишта или давање кислород.
Појава на пониски резултати е почеста кај бебиња родени со царски рез, предвремено родени бебиња, по ризична бременост или породување со компликации.
Дали треба да се грижите ако оцената е ниска?
Во повеќето случаи – не. Апгар-тестот е брз показател за состојбата на бебето веднаш по раѓањето, но не ја предвидува неговата иднина. Апгар-оценката покажува колку брзо новороденчето се прилагодува на живот надвор од матката. Кај повеќето витални бебиња, таа е меѓу 8 и 10 поени, објаснуваат неонатолозите. Ако првата оценка е пониска, најчесто втората по пет минути е подобра. Дури и ако е потребна дополнителна проценка (по 10, 15 или 20 минути), тоа не значи дека вашето бебе ќе има трајни проблеми.
Запомнете:
- Низок резултат не значи дека бебето не е здраво;
- Висок резултат не гарантира совршено здравје;
- Тестот е само моментална слика во првите минути по раѓањето.
