Не можете однапред да знаете дека ќе имате блага форма на Ковид-19. Ако сепак добиете тешка форма, може да завршите со проблеми до крајот на животот, бидејќи вирусот може да предизвика автоимуна реакција, вели водачот на студијата д-р Пол Уц од Универзитетот Стенфорд
Тешката форма на Ковид-19 може да го измами имунолошкиот систем и да го поттикне да произведува антитела кои имаат потенцијал да го нападнат здравото ткиво и да предизвикаат воспалителни болести, предупредуваат научниците во трудот објавен во часописот „Nature Communications“.
Истражувачите откриле автоантитела во примероците од крв на приближно 50 проценти од 147 хоспитализирани пациенти со Ковид-19 што ги проучувале, но кај помалку од 15 проценти од 41 здрав волонтер.
Од 48 пациенти со Ковид-19 истражувачите земале примероци од крв во текот на неколку дена, вклучително и денот на приемот во болница, што им овозможило да го следат развојот на автоантителата.
„Во рок од една недела… околу 20 проценти од тие пациенти развиле нови антитела кон сопственото ткиво, кои не биле присутни на денот на нивното примање“, рече водачот на студијата д-р Пол Уц од Универзитетот Стенфорд.
Тој ги повика луѓето да се вакцинираат.
„Не можете однапред да знаете дека ќе имате блага форма на Ковид-19“, рече тој. „Ако сепак добиете тешка форма, може да завршите со проблеми до крајот на животот, бидејќи вирусот може да предизвика автоимуна реакција“, рече тој.
„Не сме проучувале ниеден пациент доволно долго за да знаеме дали тие автоантитела се уште се присутни една или две години подоцна“, додаде тој, но истакна дека развојот на автоимуни заболувања е можен.
