Новите татковци најчесто се збунети со нивната нова улога. Доаѓањето на бебето целосно го менува животниот ритам и навики, а освен со новиот член, татковците мора да се соочат и со промените на нивната апртнерка која штотуку поминала низ огромна физичка и емоционална промена.
Ова се неколку совети за новите татковци како да постапат во новонастанатата ситуација.
Сте верувале дека по породувањето и раѓањето на бебето, вашата партнерка ќе биде онаа старата на која сте навикнале, а тоа и не е баш така. Хормоните го прават своето, а неа и е потребно време, околу 6 недели да се опорави. Притоа, двајцата морате да се навикнете на бебето и задоволувањето на неговите потреби кои од сега се приоритет и константа.
Во тој чувствителен период на вашите партнерки, мора да бидете исклучително внимателни и да дадете се од себе да им помогнете на мајката и на бебето, а особено кога е во прашање доењето.
Доколку забележите дека мајката има одредени емоционални потешкотии, реагирајте навреме и предложете и да посети психолог бидејќи постпородилната депресија е нешто што може да и се случи на секоја жена и не е невозможно да се излечи.
Не делете совети
Колку и да ви изгледа нормално, речениците како: “Мислам дека бебето е гладно“ или “Ги наполни пелените“, подобро е да не ги кажувате, туку да се фатите за работа и да понудите ваша помош при пресоблекувањето, а на мајката која дои сварете и чај, супа или нешто што сака да испие.
Дајте и два часа слободни
Прашајте ја вашата партнерка дали и треба време да се одмори и барем два часа превземете ја грижата за бебето. Ако таа експлицитно не ги побарала, на мајката не и требаат ваши совети, туку дела. Помогнете и така што ќе одите во набавка на намирници, средете го станот, а не е наука и да сварите една супа. Дури и да не знаете да готвите, веруваме дека со инструкциите на партнерката ќе завршите одлична работа.
Земете го бебето по доење
Доењето е исцрпувачко и вашиот ангажман ќе биде и тоа како забележан и ценет. Помогнете и на мајката по доењето така што ќе го подигнете бебето да подригне а неа ќе и овозможите кратка пауза.
Не форсирајте сексуален однос
Уште еден важен факт за кој треба да бидете свесно е дека вашата партнерка можеби нема веднаш да биде подготвена за интимен однос. Со тоа веднаш помирете се и покажете разбирање. Имено, таа штотуку поминала низ болно породување и потребно е малку време болката да се повлече. Покрај физичката неподготвеност, сметајте на емоционалната. На некои жени им треба повеќе време да се опорават и да се обидат да сфатат дека нивното тело поминало низ низа големи промени и дека е потребно време да се врати на старо. Сексот не е единствената форма на интимност, дајте и емотивна поддршка и важно е да го следите нејзиниот ритам.
Поделете ги обврските
Исклучително е важно да ги поделите обврските. На жената секогаш и останува најголемиот дел од товарот поврзан со куќата и бебето бидејќи татковците се враќаат на работа по некое време. Само затоа што поголемиот дел од денот го поминувате на работа, не значи дека сте ослободени од домашните работи. Помогнете да го исчистите станот, одете на прошетка со бебето и дајте и малку време на мама да се одмори. Иако е цел ден дома, таа понекогаш нема време ниту за туширање, а камоли за домашни работи.
