За новите родители, фразата „Спие како бебе“ може да добие сосема ново значење. Ова не е само затоа што повеќето бебиња спијат многу малку, туку и затоа што многу бебиња можат да бидат многу гласни додека спијат. Бебињата дишат многу побрзо од возрасните. Тоа е затоа што тие немаат голем капацитет на белите дробови кој би можел да задржи многу кислород, па мораат почесто и побрзо да вдишуваат и издишуваат. Возрасен човек вдишува 18 до 20 пати во минута, додека новороденчето вдишува од 40 до 60 пати.
Дишењето на бебето не е еднолично. Новородените бебиња имаат многу брзи и плитки вдишувања, кои може да изгледаат како да се задишани. Понекогаш дишат подолго и побавно. Исто така, тие можат да паузираат неколку секунди кога воопшто не дишат. Ова се нарекува „периодично дишење“ и е сосема нормално кај здрави бебиња. Како што растат бебињата, нивните шеми на дишење се менуваат.
За разлика од возрасните, бебињата не се во состојба да го просчистат своето грло со кашлање, што може да предизвика гласно дишење.
Поради ова, понекогаш е корисно да се користат физиолошки капки за носот, кои можат да го растворат секретот и да му помогнат на бебето полесно да дише. Бебињата дишат гласно од неколку причини:
- Нивните дишни патишта се мали, што значи дека не можат да внесат многу воздух одеднаш.
- Новороденчињата имаат многу мал нос и тесни ноздри.
- Нивниот нос е често запушен.
- Назалната конгестија често може да биде причина за гласно дишење.
- Вишокот на плунка во задниот дел на грлото може да предизвика и гласно дишење.
- Ларингомалација
Ларингомалација е вродена мана на гркланот која се карактеризира со слаба ларингеална ‘рскавица. Бебињата со ларингомалација често дишат многу гласно, а тоа најмногу се забележува кога јадат или плачат. Ларингомалацијата обично се забележува во првите недели од животот и трае до 12-тиот или 18-тиот месец на бебето, па затоа не е потребен посебен третман.
Кога моето бебе ќе престане да дише гласно?
Обично веќе на шест месеци, бебињата престануваат да дишат гласно. Како и возрасните, тие учат да вдишуваат преку нос и издишуваат преку устата. Исто така, околу шестиот месец, капацитетот на белите дробови е подобро развиен.
Кога треба да се однесе бебето на лекар?
- Ако бебето е летаргично (млитаво) и тешко се буди.
- Ако бебето кашла и се слуша „свирење“ од белите дробови.
- Ако бебето има покачена температура.
- Ако забележите дека градите на бебето не се движат додека дише, туку се движи кој било друг дел околу него. Ова може да значи дека бебето користи други мускули за да го исфрли воздухот од белите дробови.
- Ако сте загрижени за нешто.
