Првиот говор на бебето е плачењето. Потоа, како се навикнува на животот надвор од матката, во комуниакцијата воведува и други елементи – движења на лицето и телото. Така, со својот говор на телото може да каже дали е уморно, гладно, дали е целосно будно и подготвено за игра и дружење, дали сака да одмори.
На бебето му е важно да го разберете неговиот јазик
Кога ќе го прочитате бебешкиот говор на телото и ќе одговорите на неговите потреби, на детето му давате чувство на сигурност и тоа се чувствува заштитено. Воедно, тоа ви помага да од најраните денови со бебето изградите цврст однос, а тоа е важно за емоционалниот, когнитивниот, но и за моторниот развој.
Препознавање на бебешките знаци
Сите бебиња испраќаат знаци за тоа како се чувствуваат и што им е потребно. Иако секое од нив развива своја мешавина на знаци за да ви каже што точно сака, постојат некои универзални знаци, кои се рефлексивни и ги користат повеќето новороденчиња.
За да знаете дека се гладни, бебињата, освен што плачат, често ги користат рачињата. Истражувањата покажале дека кога се гладни, цврсто ја стискаат рачката во тупаница. Потоа, кога ќе почнете да ги храните, како што стануваат сити, почнуваат да ги ослободуваат прстите и целосно ја опуштат дланката. Останати знаци кои укажуваат на глад се звук со устата, имитирање на цицање, вовлекување воздух, кога ќе ги ставите блиску до вас, бебето ја врти главата кон градите.
Доколку бебето е уморно и подготвено за спиење, ќе забележите како гледа во далечина, неговите движења се исрекинати, се проѕева,се врти нервозно, ги цица прстите или цуцлата, го менува ритамот и да губи интерес за луѓе или играчки.
Постарите бебиња обично веќе ја имаат усвоено рутината “хранење-играње-спиење“. Но, тие на свој јазик знаат да кажат дека се расположени за игра. Очите им се широко отворени, бараат контакт со очите, се смешкаат и ги пружаат рацете кон вас.
Како што се развива вашето бебе, неговиот “јазик“ ќе станува поиндивидуализиран, односно ќе се гради во интеракција со вас. Колку побрзо одговарате на неговите потреби, бебето ќе го доживее тоа како поттик за збогатување на своите комуникациски знаци. Уживајте во првата комуникација со вашето бебе бидејќи е магична, а толку брзо поминува.
