Долгите непроспиени ноќи веројатно се еден од најголемите предизвици во првата година со бебе, а понекогаш е навистина мистерија зошто бебињата се будат среде ноќ. Откако ќе го нахраните бебето и ќе му ја смените пелената, а тоа и натаму не спие – неактивноста во текот на денот може да биде главниот виновник.
Така барем тврди ново истражување од Универзитетот во Мичиген. Тие проучувале 22 здрави шестмесечни бебиња и во текот на 24 часа го следеле нивното ниво на физичка активност и сон. Откриле дека бебињата кои се помалку активни преку ден, помалку спијат во текот на ноќта. А, она што го предлагаат како решение може да ве изненади: Повеќе време поминато на стомаче може да значи и повеќе проспиени ноќи за бебето, но и за мајката.
Времето поминато на стомак се однесува на некој период во текот на денот кога бебето е легнато на своето стомаче додека родителите го надгледуваат и поттикнуваат развивање на моторички способности. Истражувањето се фокусирало токму на влијанието на физичката активност, како оваа, на бебето.
“Можеби лежењето на стомак директно не влијае на спиењето, но тоа ја зголемува физичката активност и промовира здрав пораст на тежината“, објаснува проф. Џенет Хаук. Таа вели дека родителите кои мислат дека нивното бебе недоволно спие, може да воведат повече лежење на стомаче со цел да поттикнат поголемо ниво на физичка активност кај бебето.
