Доенчето во текот на првата година минува низ големи скокови во развојот. Тие ги означуваат периодите на детскиот нормален развој во кои доаѓа до промена на ритамот на хранење, често и спиење (почесто будење), промена во детското однесување (понервозно е, понемирно, поплачливо) и има поголема потреба за дојка. Повеќето деца воспоставуваат свој ритам на хранење а зголемената потреба за цицање, односно за дојка најчесто е поврзана со скоковите во развојот. Кај децата не постои одредено правило колку грама дневно ќе добијат на тежина и колку милиметри дневно ќе пораснат. Тоа е индивидуално за секое дете, потенцираат лекарите.
КОГА ДОАЃА ДО ПРВИОТ СКОК?
Првиот скок во развојот доаѓа помеѓу седмиот и десетиот ден од животот, во кој детето го минува првиот развоен и моторички напредок, поради што има поголема потреба за храна. Важно е мајката секој пат да одговори на детскиот плач со нудење на дојка и подој, за да по системот на понуда и побарувачка, количината на мајчиното млеко за неколку дена да се прилагоди на детските зголемени потреби.
Следниот скок во развојот се јавува околу третата и шестата недела, па потоа во третиот месец од животот, оа во шестиот месец и во деветиот месец, во фази кога детето почнува да се врти, да гуга, да ползи, да оди. Скокот во развојот е проследен со зголемување на висината и тежината на детето, а паралелно се зголемува и апетитот на детето.
Скоковите во развојот не престануваат со првата година од животот. Растот и развојот се одвива и по наведениот временски период. Мајките забележуваат скокови во развојот на неколку месеци во текот на детството, а потоа периодично и низ тинејџерскиот период.
ДОЈТЕ ГО ДЕТЕТО КОГА САКА И КОЛКУ САКА
Скокот во развојот обично трае 2 до 3 дена, а понекогаш и 7 дена. Зголемената побарувачка за млеко за време на скокот во развојот е привремена. Некогаш бебето бара дојка на секој час во тој период. Ако почесто го доите детето, велат лекарите, вашите залихи на млеко ќе се зголемат, а детето ќе ја добие количината која му е потребна. Дваесет минути доење на секој час, е поефикасно за зголемување на производството на мајчино млеко, отколку поредок и подолг подој.
Ако вашето дете е во фазата на скок во развојот, овозможете му да цица и храни кога сака и колку сака.
По навршените шест месеци од животот, со постепено воведување на дохрана, барањето на детето за мајчино млеко постепено ќе почне да се намалува.
За некои мајки, овие скокови во развојот може да бидат стресни, оти бебето почесто бара да цица, и преку ден и навечер. Важно е да останете смирени, да бидете трпеливи, и да се насочите на одговорање на потребите на детето.
