Кога децата ќе го откријат движењето и истражувањето, како да стануваат прилично непредвидливи. Иако вам ви се чини дека физички и моторно се подготвени за следниот чекор, тие сепак одлучуваат малку да оддолговлечат со напредокот.
На пример, вашето малечко веќе стои цврсто на двете нозе, дури не треба ни да се држи за мебелот, но никако да се одлучи да го направи првиот самостоен чекор. И поминуваат недели додека истражува и се движи низ куќата, но придржувајќи се за столици, шкафчиња, кревети… А вие нетрпеливо го чекате тој момент затоа што сакате да бидете сведоци на таа голема победа на вашето дете и секако да ги снимите првите чекори. Педијатарката Џенифер Шу објаснува кои се 4 сигурни показатели дека вашето бебе ќе прооди секој момент.
Знак број 1: Самостојно оди
Очигледно, додека не успее самостојно да стане и стои, бебето нема да прооди. Во повеќето случаи, децата почнуваат да стојат на 8-месечна возраст. Прво се придржуваат и стануваат, а потоа полека почнуваат да ги пуштаат „помагачите“ и стојат неколку секунди без придржување, но сè уште не се подготвени да зачекорат. Може да поминат и месеци од првото стоење до првиот чекор.
Знак број 2: Вашето бебе е немирно
Се сеќавате кога почнаа да излегуваат првите заби? Кога и бебето да достигне нова пресвртница, станува понервозно, а тоа ќе го забележите во текот на хранењето или легнувањето на спиење. Ако проблемите се појавуваат таму каде што ги немало, значи дека се подготвува некој следен чекор во совладување на нови вештини.
Знак број 3: Промени во спиењето
Со оглед дека бебето при секој напредок и скок во развојот троши повеќе енергија, вашето малечко пред да прооди може да почне подолго да спие. Инаку, еден од развојните скокови доаѓа помеѓу 10 и 11 месеци од животот на бебето. Но ако бебето по навршените 12 месеци го продолжи попладневното спиење, можеби собира сила за своите први самостојни чекори.
Знак број 4: Ги тестира своите способности
Откако бебето ќе научи да се крева, веројатно ќе почне самостојно да ја „тестира“ рамнотежата. Кога детето ќе прооди, нема врска со моторниот напредок, туку е поврзано и со неговата личност. Некои деца едноставно сакаат само да ги тестираат своите способности и да играат на сигурно, а некои ќе се впуштат во нова авантура – па што биде, биде.
