„Модерна“ започна со тестирање на својата вакцина против Ковид-19 кај деца на возраст од 6 месеци па се до 11 години, објави компанијата. Студијата ќе ја процени безбедноста и ефикасноста на вакцината на „Модерна“, дадена во две дози, во интервал од 28 дена, а планирано е со истражувањето да бидат опфатени 6.750 деца во САД и Канада, пренесува „Дејли мејл“.
Првите деца кои ќе бидат вакцинирани во секоја група ќе добијат најмала доза на вакцина, така што истражувачите ќе можат да внимаваат на несаканите ефекти пред да даваат повисоки дози на другите деца
Секое дете во студијата на „Модерна“ ќе добие две дози од вакцината, со разлика од 28 дена. Студијата ќе има два дела. Во првиот, деца на возраст од 2 до 12 години ќе добијат две дози од по 50 или 100 микрограми. Оние деца кои се под 2-годишна возраст ќе добијат две дози од 25, 50 или 100 микрограми (една доза за возрасни е 100 микрограми), пишува „Њујорк тајмс“.
Првите деца кои ќе бидат вакцинирани во секоја група ќе добијат најмала доза на вакцина, така што истражувачите ќе можат да внимаваат на несаканите ефекти пред да даваат повисоки дози на другите деца.
„Модерна“ веќе спроведува слично истражување кај деца на возраст од 12 до 17 години, а истото го прави и компанијата „Фајзер“, која ја испитува вакцината кај деца постари од 12 години.
- Доколку овие истражувања ги дадат очекуваните резултати, децата во средните и основните училишта може да се вакцинираат до почетокот на есента.
За децата помлади од оваа возраст, имунизацијата не се очекува пред почетокот на следната година.
Вакцината на компанијата „Модерна“ веќе е одобрена за лица над 18 години во САД. Децата досега не беа приоритет во вакцинирањето, бидејќи нивното заразување со вирусот беше на многу ниско ниво.
