Луѓето кои прележале коронавирус имаат двојно поголем ризик од развој на опасни крвни згрушоци во белите дробови во споредба со луѓето кои не биле заразени со Ковид, како и двојно поголем ризик од развој на респираторни проблеми, покажало новото американско истражување.
Белодробната емболија обично се јавува откако крвниот згрушок ќе „допатува“ во белите дробови од длабоките вени на нозете и може да предизвика сериозни проблеми
Истражувањето на Американскиот центар за контрола и превенција на болести покажало дека секој петти возрасен на возраст од 18 до 64 години и секој четврти на возраст над 65 години имале здравствени проблеми кои би можеле да бидат поврзани со Ковид, а новите резултати се совпаѓаат со наодите од претходните истражувања.
Од сите состојби, кај младите возрасни и кај оние над 65 години најмногу се зголемил ризикот од развој на акутна белодробна емболија или згрутчување во пулмоналната артерија, како и респираторни симптоми како што се хронична кашлица или отежнато дишење.
Белодробната емболија обично се јавува откако крвниот згрушок ќе „допатува“ во белите дробови од длабоките вени на нозете и може да предизвика сериозни проблеми, како што се оштетување на белите дробови, ниско ниво на кислород во крвта, но и смрт.
Студијата се заснова на податоци од повеќе од 350.000 здравствени картони на пациенти кои боледувале од Ковид-19 од март 2020 до ноември 2021 година и на здравствени податоци на 1,6 милиони луѓе од „контролната“ група кои побарале медицинска помош во истиот период, но без дијагностициран Ковид-19.
Експертскиот тим на научници ги проучувал податоците за појава на 26 клинички состојби кои претходно биле поврзани со долг Ковид. Состојбата на пациентите била следена еден месец од моментот кога првпат ги пријавиле тешкотиите што ги чувствувале по надминување на Ковид или во период од една година.
Најчесто забележани состојби во двете возрасни групи биле респираторни проблеми и мускулно-скелетни болки.
Појавата на инцидентни состојби по надминување на инфекцијата може да влијае на работната способност на пациентот и да се одрази на економската состојба во семејството, но и дополнително да ги оптовари здравствените системи, пишуваат авторите.
Ограниченоста на студијата е тоа што не биле земeни предвид податоците за полот, расата и географскиот регион, како ни статусот на вакцинација. Поради периодот во кој е создадена, студијата не ги опфатила ниту поновите варијанти на коронавирусот, објаснуваат авторите.
