Со оглед на загрижувачките податоци за бројот на случаи на ненадејна смрт на новороденчињата во кревет, се поставува прашањето дали бебето треба да се стави да спие во положба на грб или на стомак.
Имено, честото поставување на бебето да спие во положба на грб довело до значително намалување на инциденцата на СИДС кај новороденчињата, споредувајќи ги податоците помеѓу 2000 и 2010 година. Меѓутоа, она што загрижува е двојното зголемување на случаите на задушување на бебето за време на спиењето во 2010 година, во однос на 2000 година.
Покрај употребата на т.н. „мека и небезбедна постелнина“, значајна потенцијална причина за задушување на бебето во кревет е и неговата положба на страна за време на спиењето, како и спиењето заедно со родителите
Причината за ова се смета дека е употребата на т.н. „мека и небезбедна постелнина“. Ова се однесува, пред сè, на ќебиња, јоргани и перници со кои бебето често се подзавиткува или со нив се обложува внатрешноста на креветчето, понатаму меките кадифени играчки во креветчето и неправилно наместените чаршафи. Иако постојат препораки за избегнување на вакви постелнини, причината за нивното масовно користење е главно мислењето на родителите дека на бебето така му е поудобно, потопло и покомфорно. Исто така, значајна потенцијална причина за задушување на бебето во кревет е и неговата положба на страна за време на спиењето, како и спиењето заедно со родителите.
Медиумите, магазините за родители и слични списанија сносат дел од „вината“ и одговорноста за оваа појава, со оглед на тоа што во нив честопати може да се видат фотографии од бебиња „пикнати“ во меки постелнини додека спијат, во несоодветна и небезбедна позиција, со што кај родителите се создава мислење дека тоа е прифатливо, правилно, а веројатно и пожелно.
Неопходно е поради безбедноста на вашето бебе да се придржувате кон следниве совети со цел превенција на ненадејна смрт на новороденчето на спиење:
- Користете вреќи за спиење за бебе, кои се релативно крути, пред сè во горниот дел и спречуваат поголемо маневрирање на бебето за време на спиењето и настанување на опструкција на носот и устата.
- Ставете го бебето на тврд душек, а чаршафот одоздола добро наместете го, затегнете убаво.
- Отстранете ги сите потенцијални „опасности“ од креветчето на бебето (меки перници, ќебиња, јоргани, кадифени играчки).
Официјалната препорака на „American Academy of Pediatrics“ вели: „Ставете го бебето да спие во положба на грб, на цврста подлога или во креветче кое ги задоволува важечките стандарди за безбедност“.
Постои јасно т.н. ABC правило:
A – Alone (само, а НЕ со родителите, играчките, перниците);
B – On my back (на грб, а НЕ на стомак или на страна);
C – In my crib (во креветче, а НЕ во креветот на родителите, на кауч или фотелја).
