Болеста на гребаница од мачка (cat scratch disease) е бактериска инфекција до која доаѓа по гребење од мачка, најчесто мало маче. Причина за болеста е бактеријата bartonella henslae која се наоѓа под ноктите на мачката и кај мачката не предизвикува никакви тегоби. Ретко до болеста доаѓа по гризење од мачка.
Неколку дека ( 3 до 10 дена) по гребењето на мачката, се јавува оток или црвено обоена папула која може да се превиди со убод од инсект. Најчесто се наоѓа на рацете или на нозете, поретко на главата.
Во наредните една до четири недели, може да дојде до зголемување на лимфните јазли во близина на изгребаното место, кога лимфниот јазол или група на лимфни јазли ќе отечат и ќе станат болни и чувствителни. На пример, ако гребаницата е на раката, доаѓа до зголемување на лимфните јазли на лактот или на пазувите на истата рака. Тие може да се зголемат над два сантиметри, да бидат отечени и болни при допир. Кај повеќето деца главен симптом е зголемување на јазлите, што ги загрижува родителите, кои и не ја забележуваат гребаницата од мачка како причина.
Ова е еден од честите причинители за лимфаденопатија (зголемување на лимфните јазли). Болеста главно е блага, а покрај зголемување на регионалните лимфни јазли, детето може да има и зголемена телесна температура, слабост, губење на апетитот, главоболка, а понекогаш и осип.
Како мерка на превенција се советува избегнување на контакт со непознати мачки, а ако дојде до гребење, местото се испира со вода, благ сапун и средство за дезинфекција.
За раната да зарасне обично се потребни околу 3 недели, што зависи од длабочината на раната, а лимфните јазли може да останат зголемени и 2-4 месеци, понекогаш и подолго, што создава загриженост кај родителите, а понекогаш на гребаницата и се заборава, ако тегобите биле благи.
Во повеќето случаи не е потребна терапија, евентуално локално антибиотска маст на местото на гребаницата.
Болеста на гребаница од мачка е нешто што треба да се има на ум доколку дојде до зголемување на лимфните јазли, оти тоа создава голема грижа и паника кај родителите, а со знаењето дека ова е една блага болест со добра прогноза, ако детето претходно било во контакт со мачка, може да ги смири родителите кои при зголемување на јазлите секогаш помислуваат на најсериозни болести.
