Голем број трудници – од половина па сè до три четвртини – доживуваат болка која често не се лекува. Таквата болка може да предизвика сериозни последици, иако многу од нив можеле да се спречат. Идните мајки често избегнуваат лекови од страв дека може да му наштетат на детето, но ретко кој ги предупредува дека и нелекуваната болка може да биде опасна.
За оваа важна тема пишува Џули Вигнато, од Универзитетот во Ајова, која ги анализирала искуствата и податоците на жени од САД.
- Болката во бременоста не е само привремена непријатност
Жените често слушаат дека болката во бременоста е нормална и минлива. Но, кога болката станува толку силна што трудницата не може да спие, да работи или да се грижи за другите деца, тогаш станува збор за сериозна состојба која бара внимание и третман.
Болките во грбот и главоболките често продолжуваат и по породувањето, а во некои случаи можат да траат повеќе од три месеци и да се развијат во хронична состојба. Таквите болки најчесто се поврзани со природни промени во телото, како хормонални осцилации, опуштање на зглобовите или промени во држењето на телото поради тежината на бебето.
Најинтензивните болки обично се јавуваат во третиот триместар. Сепак, истражувањата покажуваат дека повеќе од половина трудници кои пријавуваат болка не добиваат соодветна помош или терапија.
- Зошто достапните третмани не се доволни
Лекувањето на болката во бременоста е ограничено поради претпазливост кон лековите. Парацетамолот се смета за безбеден, но помага главно кај полесна болка. Кај посилни болки неговата ефикасност е под знак прашалник.
Алтернативни методи на лекување – како примена на топлина или студ, масажа, вежби, физикална терапија или киропрактика – можат да донесат олеснување, но често се скапи, не се покриени со здравствено осигурување и не се доволно познати меѓу лекарите.
- Нелекуваната болка може да има сериозни последици
Според истражувањата на Џули Вигнато, кога жените пријавуваат болка, најчесто добиваат совет да одморат, да земат парацетамол или да одат порано на породилно отсуство. Но, тоа не е практично решение за жените кои работат или се грижат за други деца, а многу од нив не можат да си дозволат рано отсуство.
Постојаната болка може да предизвика чувство на беспомошност, безнадежност и емотивна исцрпеност – што се воедно и симптоми на депресија. Дури 44% од трудниците кои чувствуваат силна болка развиваат средни до тешки симптоми на депресија во третиот триместар.
Депресијата во бременоста е поврзана со зголемен ризик од самоубиство, кое е меѓу водечките причини за смрт кај трудници и родилки во САД. Дополнително загрижува фактот што на некои жени, поради силни болки, им се препишуваат опиоиди – секоја петта жена признала дека ги злоупотребила, што може да го загрози и бебето, особено ако развие апстиненциски симптоми по раѓањето.
- Отворениот разговор е првиот чекор кон помош
Решението започнува со разговор. Важно е трудниците да бидат искрени кон себе и кон своето опкружување. Многу жени не знаат дека имаат право да побараат подобра поддршка и повеќе информации.
Бременоста е време кога треба да се слуша сопственото тело. Во ред е да се забави темпото. Ако болката ве спречува да го подигнете детето или да ги извршувате секојдневните задачи, обидете се да му пружите блискост преку мирни моменти – како гушкање на каучот.
Разговорот со партнерот, семејството или пријателите е исто така клучен. Изберете мирен момент и отворено кажете како се чувствувате. Наместо обвинувања, користете реченици што почнуваат со „Се чувствувам…“ за другите полесно да ве разберат.
- Подготовка за разговор со лекарот
Пред да го посетите лекарот, запишете ги сите грижи и симптоми. Бидете искрени за тоа колку болката влијае на спиењето и секојдневниот живот. Опишете го чувството на болка и кажете дали сте пробале нешто за да ја ублажите.
Ако не добиете соодветно решение, прашајте за други можности. Побарајте упат за физикална терапија или второ мислење. Не се откажувајте по еден разговор.
Болката во бременоста не е нешто што мора да се трпи. Важно е жените да се чувствуваат видени, разбрани и поддржани. Кога болката се сфаќа сериозно, можно е да се најде олеснување и да се спречат потешки последици.
