Постепено се развиваат клетките од кои подоцна се создава постелката која ќе го храни вашето бебе. На горната површина на ембрионалниот диск се појавува едно вдлабнување, кое се нарекува примитивна пруга од која подоцна ќе се развие локомоторниот систем (мускулите на трупот и екстремитетите, ребрата, ‘рбетните пршлени). Од другата бразда која се појавува на горната површина на овој диск се развива нервниот систем. Ембрионот почнува полека да лачи од хормонот bHCG (хорионски гонадотропен хормон) кој е присутен во телото на мајката и на него реагираат повеќето домашни тестови за бременост.
Бебето веќе е видливо со голо око и е со величина од 1 милиметар. Почнува постепено да се јавуваат првите симптоми на бременост, меѓутоа тие се многу слични на оние кои се јавуваат пред менструалниот циклус (зголемување на градите, промена на расположението).
Со оглед дека бебето целосно е врзано на вас, и дека целата храна ја прима преку вашиот крвоток, многу е важно во текот на бременоста здраво да се храните.
Ако и пред бременоста здраво и балансирано сте се хранеле, во бременоста настапуваат само мали промени. Дневните потреби во калории растат по 20. недела и тоа за 200-300 калории на ден.
