Според статистичките податоци, секое десетто дете на возраст од две до три години ги чкрта забите во сон. Ова чкртање на забите во медицинскиот речник се нарекува бруксизам, а добрата вест е што повеќето деца го надминуваат овој проблем.
Чкртањето со забите најчесто се случува кога детето е во длабок сон или под стрес.
Причини за бруксизам
Експертите сè уште не се сосема сигурни што точно предизвикува бруксизам, но наведуваат неколку можни причини.
На пример, во некои случаи се случува децата да ги чкртаа забите бидејќи горната и долната вилица се уште не се во правилна положба, па во текот на ноќта не можат да ги „наместат“ забите. Освен тоа, понекогаш оваа појава може да биде и знак дека детето го боли уво или заб и дека всушност се обидува да ја ублажи болката со стегање на вилицата.
Стресот исто така се наведува како една од причините за бруксизам, па ако вашето дете чкрта со забите, размислете дали во скоро време поминало или сè уште минува низ голема промена или животна фаза што е стресна за него – промена на училиште, наставници, добивање помлад брат или сестра, поаѓање во градинка…
Бруксизмот често се јавува кај хиперактивни деца, но и кај оние кои земаат одредени лекови или имаат медицински проблеми како церебрална парализа.
Последици од бруксизмот
Во повеќето случаи, бруксизмот нема сериозни последици, но има примери кога како последица се појавиле главоболки или болки во увото.
Исто така, во зависност од тоа колку е агресивно чкртањето на забите и колку долго трае, може да ја оштети забната глеѓ и да предизвика проблеми со коските на лицето и вилицата, како што е болест на темпоромандибуларниот зглоб, иако тоа се случува многу, многу ретко кај децата.
Како да препознаете бруксизам
Децата кои чкртаат со заби често не се ни свесни за тоа, па членовите на семејството се тие кои први го препознаваат проблемот. Во таа насока, внимавајте дали се слуша звук на чкртање на забите додека детето спие, дали детето се жали на болки во вилицата или по будењето, како и дали се жали на болки при џвакање.
Исто така, доколку детето не се жали на вакви болки, но имате впечаток дека детето често ја стега вилицата, најдобро е да го однесете на стоматолог кој ќе ја процени ситуацијата според состојбата на забите.
Како да му помогнете на детето
Како што рековме, повеќето деца го надминуваат бруксизмот, но додека тоа не се случи, еве неколку можни решенија.
Во случаи кога стоматологот ќе процени дека чкртањето може да ги оштети забите, тој ќе препорача штитници за заби, како што се оние што ги носат спортистите.
Исто така, топла бања пред спиење, смирувачка музика или читање книга може да го опушти детето пред спиење и на тој начин да го ублажи чкртањето на забите во сон.
Доколку се сомневате дека причината за бруксизмот кај детето е стресот, тогаш најдобро е да разговарате со него за тоа како се чувствува и зошто и на тој начин да се обидете да му помогнете. Доколку проблемот е покомплексен и не знаете како да му помогнете на детето, можете да побарате помош од психолог.
