ПИШУВА:
Д-р Даница Поповска
специјалист по ортопедија
СОВЕТИ ЗА ПРАВИЛНО НОСЕЊЕ НА РАНЕЦ
♦♦♦♦♦♦♦
Во денешно време ранецот е вообичаено средство за носење книги и други потребни предмети во училиште. Ранците овозможуваат распоредување на товарот на најјаките мускули во телото и на таков начин се добар избор за носење на потребните материјали во училиште.
Меѓутоа, ранците кои се премногу тешки или се носат неправилно можат да предизвикаат низа проблеми кај децата. Несоодветното користење на ранците може да доведе до болки во вратот, грбот и рамената, како и до проблеми во држењето (ставот) на детето.
Родителите многу често се загрижени дека тешкиот ранец може да предизвика искривување на ’рбетот кај детето – сколиоза, но оваа грижа е неоснована. Ранецот не може да предизвика сколиоза.
Родителите треба да обрнат внимание како детето го става, носи и симнува ранецот. Ако изгледа дека детето се мачи со овие постапки, најверојатно ранецот е претежок. Во таков случај, може еден или два потешки предмети (книги) да ги извади и да ги носи во раце
Правилниот избор на соодветен ранец за детето е значаен за избегнување на проблемите кои можат да настанат од неговото носење. При купување на ранец секогаш треба да се внимава прерамките да се широки, со меки перничиња кои налегнуваат на рамената, за правилно да се распореди тежината од ранецот на рамената и грбот. Ранецот треба да има две прерамки – не се препорачуваат ранци со една прерамка за преку едно рамо. Самиот ранец треба да е изработен од лесен материјал и да не тежи многу кога е празен, за неговата тежина да не го оптоварува детето секојдневно. Исто така, добро е кога ранецот има и дополнителен каиш за околу половината, што додатно допринесува за порамномерно распределување на тежината.
При носење на ранецот, на детето треба да му се напомене секогаш да го става на грб на двете рамена, да не го носи само на едното рамо. Прерамките треба да бидат добро затегнати, за товарот да биде поблизу до грбот. При пакувањето на ранецот, предметите треба да се подредат на тој начин, што тешките предмети да бидат на дното и во централниот дел на ранецот, а не погоре или на една страна.
Родителите многу често се загрижени дека тешкиот ранец може да предизвика искривување на ’рбетот кај детето – сколиоза, но оваа грижа е неоснована. Ранецот не може да предизвика сколиоза
Не треба да се носат непотребни предмети – книги и тетратки кои на детето не му се потребни тој ден, или други дополнителни предмети. Доколку има можност, делови од училишниот прибор треба да се остават на училиште. Детето треба ранецот внимателно да го подига (со свиткување на колената, а не наведнување) и да го става на грб.
Родителите треба да обрнат внимание како детето го става, носи и симнува ранецот. Ако изгледа дека детето се мачи со овие постапки, најверојатно ранецот е претежок. Во таков случај, може еден или два потешки предмети (книги) да ги извади и да ги носи во раце.
Потребен е договор со наставниците за редуцирање на тежината со отстранување на предметите кои не се неопходни. Трпнење или намалена осетливост во рацете или нозете можат да укажат на претежок ранец или ранец кој не му одговара на детето. Доколку детето се жали на болки во грбот, потребна е консултација со лекар.
⇒ ПОВЕЌЕ ОД ИСТИОТ АВТОР, Д-Р ДАНИЦА ПОПОВСКА:
- Коските на децата зараснуваат побрзо во однос на возрасните
- Повредата на зоната на раст на коските кај децата се манифестира со силна болка која не поминува
- Кога вашето бебе ја држи главата наведната на едната страна
- Кога одењето на прсти треба да нè загрижи?
- Кифоза (подгрбавеност) во детската возраст – дијагноза, видови и третман
- И инфекција на дишните патишта може да предизвика накривнување (куцање) кај децата
