♦ Бебињата помали од една година можат сериозно да се разболат ако консумираат мед
♦ Медот може да содржи C. botulinum бактерија, која може да создаде токсин во тенкото црево на бебето, што доведува до ретка, но сериозна болест – ботулизам
♦ За среќа, бебешкиот ботулизам не е чест, а ботулизам заради медот е уште поредок. Сепак, Американска агенција за храна и лекови (ФДА) и Американската академија на педијатри (ААП) препорачуваат да почекате додека вашето бебе не наполни една година за да го нахраните со мед
Медот го подобрува варењето на храната, ја уништува патогената флора во цревата, ја спречува надуеноста и појавата на грчеви, го прекинува повраќањето и делува како благ лаксатив, објаснува д-р Џули Лутингер, педијатар од Њујорк. Редовното, секојдневно внесување мед обезбедува подобар развој и напредок на детето и ја зајакнува отпорноста на неговиот организам кон инфекциите.
„Медот се воведува во детската исхрана постепено, а посебно внимание е потребно кај деца чии родители имале алергиски реакции на оваа намирница. За да се искористат неговите лековити својства во целост, медот треба да се раствори во вода, овошен сок, чај или млеко, при што температура на течноста не треба да надминува 37 Целзиусови степени. Во спротивно, медот ги губи своите антимикробни својства“, советува д-р Лутингер.
Медот најмногу им годи на децата наутро, намачкан на кришка интегрален леб, во овошна кашичка, чај, млеко, лимонада, компот… За децата тој е готова храна, која нивниот организам во потполност може да ја искористи, па со право се нарекува и супернамирница.
Медот да се избегнува комплетно во првата година
Педијатрите препорачуваат да почекате додека вашето бебе не наполни 12 месеци пред да воведете мед во неговата исхрана бидејќи може да содржи спори на бактерии кои предизвикуваат ботулизам. Ова не значи дека медот е контаминиран – овие бактерии се безопасни за возрасните и децата над 1 година. Но, она што може да направи е бебињата, чиј дигестивен и имунолошки систем е помалку развиен, сериозно (а можеби и фатално) да се разболат. Поради оваа причина, најдобро е комплетно да се избегнува медот во првата година – па дури и теглите за кои се тврди дека се пастеризирани, бидејќи овој процес сè уште не може со сигурност да ги отстрани сите бактерии.
Медот најмногу им годи на децата наутро, намачкан на кришка интегрален леб, во овошна кашичка, чај, млеко, лимонада, компот… За децата медот претставува готова храна, која нивниот организам во потполност може да ја искористи, па со право се нарекува и супернамирница
Со оглед на тоа што ензимите од медот исчезнуваат во контакт со металот, секогаш треба да се консумира со дрвена или пластична лажичка. Не е добро ни веднаш да се проголта, туку треба малку да се „проврти“ во устата. На овој начин се дезинфицира слузницата на усната шуплина, а медот директно се апсорбира. За разлика од белиот шеќер, кој го „краде“ калциумот од забите на детето, медот со својот минерален состав ги чува и го подобрува нивното никнување и цврстина.
Може да содржи спори на бактеријата Clostridium botulinum
Медот го зголемува бројот на млечни бактерии (Lactobacillus acidophilus, Lactobacillus plantarum, Bifidus) кои растат во цревата на секоја личност. Тие произведуваат метаболити кои го инхибираат растот на патогените бактерии. Докажано е дека медот е многу важен во третманот на детска бактериска дијареја.
Детскиот организам го следат промени во анатомските, физиолошките, психолошките и имунолошките карактеристики. Особено доминираат промените во дигестивниот тракт и токму поради физиолошката незрелост на дигестивниот систем, медот се воведува во исхраната на децата по навршена прва година од животот. Имено, иако е една од најздравите и најлековити намирници, сепак, може да содржи спори на бактеријата Clostridium botulinum, која предизвикува ботулизам, ретка, но потенцијално фатална болест. Овие бактерии се обично безопасни за возрасни и деца на возраст над една година, бидејќи нивниот цревен тракт може да го спречи размножувањето на бактериите, меѓутоа кај бебињата тие можат да создадат токсини кои се опасни по живот.
Ботулизам – акутна болест која може да биде многу опасна
Д-р Џована Армано, педијатар од Хрватска, објаснува дека ботулизам е акутна болест предизвикана од егзотоксините на Clostridium botulinum. Може да биде многу опасна бидејќи предизвикува слабост во мускулите и проблеми со дишењето. Сепак, болеста ретко се добива, а и повеќето бебиња кои ќе се разболат закрепнуваат брзо и потполно. Ботулизмот кај бебињата може да се лекува, но поради сериозноста на болеста, многу е важно родителите навреме да ги забележат симптомите.
„Ако спорите на Clostridium botulinum се внесат во организмот на бебето, бактериите ќе се размножуваат и ќе произведуваат токсин. Овој токсин и пречи на нормалната интеракција помеѓу мускулите и нервите и на тој начин може да влијае врз способноста на детето да се движи, јаде и дише. Возрасните и децата постари од една година не се изложени на ризик затоа што нивниот дигестивен тракт е развиен и можат да ги исфрлат спорите низ телото пред да предизвикаат каква било штета“, објаснува д-р Армано.
Најчестите знаци и симптоми на ботулизам се:
- Постојан запек (констипација);
- Млитави раце, нозе и врат;
- Слаб плач поради слабост на мускулите;
- Потешкотии при доењето, бебето нема сила да го извлече млекото;
- Изразен умор на доенчето (постојана поспаност).
(Подготви: К.Ш.Д.)
