ПИШУВА:
Д-р Маргарита Камбовска
специјалист педијатар неонатолог
♦♦♦♦♦♦♦
Најчеста причина за која мајките доаѓаат поприлично вознемирени и расплакани во амбуланта се токму инфантилните колики. За нив често се пишува по порталите. Она што првенствено треба да им се разјасни на мајките е дека инфантилните колики се состојба, а не болест.
Се препорачува само умерено затоплување на мешето на новороденчето со раката на мајката или таткото и краткотрајно менување на позицијата на бебенцето. Обично се препорачува вртење на меше на некоја затоплена подлога (затоплена пелена или бебешко термофорче)
Во текот на интраутериниот живот на плодот започнува да функционира гастроинтестиналниот систем. Имено цревата започнуваат да се исполнуваат со одредено количество на плодова вода и мало количество на цревна содржина. Непосредно после раѓање доаѓа до исфрлање на првата столица која има темна боја и се вика мекониум. Во првите денови од животот како се зголемува количината на млечните обоци кај новороденчето така се зголемува оптеретувањето на цревниот систем. Се зголемува количеството на цревна содржина како и помало или поголемо количество на гасови. Тоа доведува до растегнување на цревниот зид, што индиректно бебето го доживува како болка. Секое новороденче различно се справува со оптеретувањето и со перисталтиката на цревата. Одреден дел од нив самата перисталтика која ја немало или била минимална за време на интраутриниот живот ја доживуваат болно, па се манифестира со плачење и виткање на ноџињата, најчесто во исто време од денот.
Доколку нападот на грчење на мешето заврши со дефекација или со испуштање на гасови, тогаш сме уште посигурни дека се работи за инфантилни колики. Треба да се знае дека тоа е физиолошка појава, значи не го сметаме за болест. Со оглед на тоа терапија не даваме. Се препорачува само умерено затоплување на мешето на новороденчето со раката на мајката или таткото и краткотрајно менување на позицијата на бебенцето. Обично се препорачува вртење на меше на некоја затоплена подлога (затоплена пелена или бебешко термофорче). После навршување на третиот месец, грчевите проретчуваат и непосредно потоа исчезнуваат.
После навршување на третиот месец, грчевите проретчуваат и непосредно потоа исчезнуваат
Исто така голема улога во тоа дали бебенцето ќе има стомачни грчеви или не, игра и степенот на зрелост во излачување на цревни ензими кои учествуваат во дигестијата на млекото и посебно млечниот шеќер. Токму поради тоа по проценка на вашиот педијатар во одредени случаи се препорачува внесување на ензим лактаза, кој ќе го олесни варењето и разградбата на млечниот шеќер. На тој начин има присуство на воздух кој дополнително ја дистендира цревната мускулатура која се одразува со болка. Воздухот во цревата може да биде присутен и со неправилен акт на голтање за време на хранењето без оглед дали се дои или се храни со шише.
Кога зборуваме за инфантилни колики не треба да ги заборавиме и пробиотиците. Тоа се добри бактерии кои доколку побрзо и побројно ја колонизираат цревната слузница, толку побрзо ќе имаме клиничко намалување и олеснување на грчевите. Не земајте на своја рака пробиотик, сите пробиотици на пазарот имаат различни бактерии, за различна намена. Вашиот педијатар знае кој пробиотик да го користите за вашето дете и колку долго. Мајчиното млеко е идеален извор на пробиотик за новороденечка и доенечка возраст.
Доколку нападот на грчење на мешето заврши со дефекација или со испуштање на гасови, тогаш сме уште посигурни дека се работи за инфантилни колики
Многу битен податок кој мајките и идните мајки треба секако да го земат предвид е фактот дека бебенцата кои се на мајчино млеко имаат значително полесни грчеви и во полесна форма. Мајчиното млеко има идеален состав за полесна дигестија и обработка во желудникот и цревата.
Доколку се многу чести и интензивни добро е да се направи консултација и преглед кај педијатар за потврдување на истото. Кога се убаво ќе и се објасни на мајката, истата епизода на грчеви ќе ја доживее помалку стресно и ќе знае како да постапи со своето бебенце.
