Д-р Марија Гњатовиќ од Институтот за примена на нуклеарна енергија во Србија за РТС наведува дека омикрон сојот на коронавирус брзо се шири и дека има голем притисок врз Ковид амбулантите. Оценува дека сојот не изненадил на многу начини, па тешко е да се предвиди кога ќе се смири овој бран.
Д-р Гњатовиќ вели дека омикрон го избегнува веќе создадениот имунитет, а притисокот врз здравствениот систем е голем.
„Има голем притисок за тестирање и во Ковид амбулантите, а помал за среќа, врз болниците. Сепак, овој сој се шири многу, многу брзо и лесно, лесно го избегнува веќе создадениот имунитет, без разлика дали е стекнат со природна инфекција или после вакцинација“, вели д-р Гњатовиќ.
Таа истакнува дека омикрон не изненадил на многу начини, пред се по брзината на ширење и фактот дека е сосема поинаков, доста изменет, па тешко е да се предвиди кога овој бран ќе се смири.
Досегашното искуство покажало дека поблагата клиничка слика предизвикува помалку антитела, а потешката клиничка слика повеќе антитела
Која е специфичноста на омикрон? Докторката објаснува дека специфичноста на омикрон е во тоа што го избегнува имунолошкиот одговор стекнат со вакцинација или природна инфекција.
„Досега тоа не го гледавме, реинфекциите кај делта сојот беа многу ретки. Сега е јасно дека реинфекциите се чести. Така што омикрон е најспецифичен токму по тоа и за среќа предизвикува поблаги симптоми. Ова се разбира допрва треба да се потврди бидејќи омикрон штотуку се појави кај нас, треба да се следи… Она што досега можевме да го видиме е дека тој сепак се задржува повеќе во горниот респираторен тракт и дека помалку предизвикува пневмонија, посериозни состојби“, вели д-р Гњатовиќ.
Она што досега можевме да го видиме е дека омикрон сепак се задржува повеќе во горниот респираторен тракт и дека помалку предизвикува пневмонија, посериозни состојби
Создавање на антитела
На прашањето дали поради тоа што симптомите на омикрон засега се поблаги значи дека по инфекцијата ќе се создадат помалку антитела, докторката одговара дека е тешко сега да се даде одговор на тоа прашање.
„За неколку недели ќе имаме попрецизни податоци за тоа. Но, секако на веќе создадениот имунитет, дополнителната инфекција со омикрон ќе го зајакне нашиот организам во имунолошка и одбранбена смисла, а што се однесува и на појавата на евентуални нови соеви“, објаснува д-р Гњатовиќ.
На прашањето колку долго антителата создадени од инфекција со омикрон ќе не штитат, колку брзо ќе исчезнат, наведува дека досегашното искуство покажало дека поблагата клиничка слика предизвикува помалку антитела, а потешката клиничка слика повеќе антитела.
Дали имаме причина за загриженост, доколку немаме антитела? „Не треба да се занемари значењето на антителата. Секако дека не се единствените, тука се и Т-клетките, но секако антителата се важни за таа прва одбрана и добро е кога ги имаме што повеќе. И сега, кога станува збор за омикрон, гледаме дека најдобро поминаа, дека се најзаштитени оние со високи вредности на антитела. Се разбира, не можеме да кажеме за секој поединец која ќе биде вредноста што ќе го заштити. Ова е општа опсервација што ќе ја испитуваме и понатаму“. (РТС)
