Доењето е наједноставниот, најздравиот и најекономичен начин да се обезбеди правилна исхрана на новороденчето
Во пресрет на Светската недела на доење, што традиционално се одбележува од 1-7 август, претседателката на поткомитетот за промоција, заштита и поддршка на доењето при Министерството за здравство, д-р Мими Кимовска Христова, специјалист педијатар, ја потенцира важноста на доењето од медицински и општествен аспект.
„Оваа година, мотото на Светската асоцијација за доење (WABA) е „Поддршка на родителите за да се одржи доењето“ (Empower parents-enable breastfeeding), со што се потенцира потребата од давање поддршка на семејствата и мајките да го одржат доењето, како и од сите чинители во општеството. Со цел доењето да биде успешно, на мајките им е потребна континуирана поддршка во сите фази од мајчинството, почнувајќи од претконцепцискиот период, во текот на бременоста и особено по породувањето, вклучително и на работното место“, вели д-р Кимовска-Христова.
Таа информира дека заради важноста на оваа тема, не само за Неделата на доење, туку и во тек на овој месец, па и година, се става силен фокус и за таа цел во периодот што следува ќе се организираат гостувања на стручни експерти од областа на доење на националните медиуми. „Исто така, е планирана и сеопфатна кампања со пораки за важноста и бенефитите на доењето – од членови на поткомитетот, реномирани лекари, педијатри, гинеколози, во текот на август, кога се одбележува Неделата на доење, а истовремено кон средината на месец август ќе се одржи тркалезна маса во која ќе бидат вклучени повеќе чинители и тоа Министерството за здравство, претседателот на поткомитетот за доење и негови членови, претставници од УНИЦЕФ, граѓански здруженија и стручната јавност“, додаде д-р Кимовска-Христова.
Предности од доењето за детето:
- Обезбедува правилен раст и развој
- Го поттикнува развојот и созревањето на одбранбениот систем
- Го намалува ризикот од дебелина
- Го поттикнува развојот на интелигенцијата
- Штити од многу болести и инфекции
- Го намалува ризикот од дијареја
- Го намалува ризикот од појава на алергија
- Го намалува ризикот од синдром на ненадејна смрт на доенчето
Доењето е еден од најважните начини за унапредување и чување на здравјето, вели Кимовска-Христова. Тоа е најдобриот начин на исхрана на доенчињата, ја поставува основата за добро здравје не само во периодот на детството, туку и во адултната возраст, воедно носи и голем број бенефити за мајките и за општеството во целост придонесувајќи кон остварување на сите 17 цели за одржлив развој на ОН.
Со цел доењето да биде успешно на мајките им е потребна континуирана поддршка во сите фази од мајчинството, почнувајќи од претконцепцискиот период, во текот на бременоста и особено по породувањето, вклучително и на работното место
Во согласност со препораките на Светската здравствена организација (СЗО) доењето треба да е екслузивно во првите 6 месеци од животот, да трае до 2 години и подолго, паралелно со воведување други видови храна по 6-от месец.
Колку почесто бебето цица, толку повеќе млеко се создава
Педијатрите препорачуваат доењето да започне веднаш по породувањето. Имено токму тој прв подој е силен стимул за понатамошно доење. Бебето се дои по 10-15 минути на секоја града, а честотата на подоите не е ограничена. Треба да се има на ум дека колку почесто бебето цица, толку повеќе млеко се создава
Досега се имплементирани голем дел од препораките на Светската здравствена организација, кои имаат за цел да го промовираат и заштитат доењето и тоа: имплементација на иницијативата „Болници пријателки на бебињата“, формиран е национален комитет за доење, постојната легислатива е прилагодена во насока на имплементација на меѓународниот код за забрана на рекламирање на замената на мајчиното млеко, како и во однос на траење на породилното отсуство и правото на вработените мајки на доење, се вели во соопштението на Министерството за здравство.
Предности од доењето за мајката:
- Помага во воспоставување на емоционална врска со детето
- Го намалува крвавењето по породувањето
- Придонесува за нормализирање на телесната тежина
- Го намалува ризикот од појава на остеопороза
- Го намалува ризикот од појава на малигни болести на дојката и јајниците
- Го намалува ризикот од постпородилна депресија
Континуирано, преку Програмата за активна здравствена заштита на мајките и децата се спроведуваат активности, кои имаат за цел промоција и заштита на доењето, како и обуки на здравствените работници, одбележување на Светската недела на доење, изготвување информативни материјали за мајките итн. Патронажната служба и превентивните советувалишта во здравствените домови, со тим од лекар и сестра се постојано на располагање во давањето стручна помош за справување со сите предизвици поврзани со доењето, велат од МЗ.
Доењето не е прашање кое се однесува само на жената
Светската алијанса за поддршка на доењето (World Alliance for Breastfeeding Action – WABA) ја започна оваа кампања во 1991 година, со цел интензивирање на активностите за заштита, унапредување и поддршка на доењето, а секоја година акцентот се става на различни теми од значење за доењето. Додека порано доењето се подразбираше само по себе, во деведесеттите години на минатиот век започна да се шири трендот на вештачка исхрана како полесен и побрз избор, но и зачување на изгледот и цврстината на градите. Доењето не е прашање кое се однесува само на жената, ниту исклучива нејзина одговорност – заштитата, промоцијата и поддршката на доењето е колективна општествена одговорност.
(К.Ш.Д.)
