Најголем број од пациентите се жалат на два главни симптоми, а тоа се диспнеја или субјективно чувство на недостаток на воздух и хронична главоболка, нарушена концентрација
Раководителката на Респираторниот центар на КБ Дубрава во Загреб, д-р Невенка Пискач-Живковиќ во ТВ гостување зборуваше за нивното искуство со долгиот Ковид-19.
Некои од пациентите кои го прележале Ковид-19, имаат симптоми и неколку месеци по дијагнозата. Тоа е она што се нарекува „долг ковид“, а д-р Пискач-Живковиќ ја објасни ситуацијата по тоа прашање во Хрватска.
„Тој број е неочекувано голем. Очекувавме дека околу 10% од пациентите ќе се јават со одредени симптоми, но таа бројка се движи околу 50%. Значителен број на пациенти имаат некои од симптомите и два до три месеци по акутната болест. Најголем број од пациентите се жалат на два главни симптоми, а тоа се диспнеја или субјективно чувство на недостаток на воздух и хронична главоболка, нарушена концентрација“, објасни д-р Пискач-Живковиќ.
Таа, исто така, наведе и поради кои симптоми на долгиот Ковид, пациентите треба да се јават на лекар.
„Бевме изненадени од бројот на пациенти кои имаат крвни згрутчувања или тромби. Очекуваме да исчезнат во рок од три до шест месеци. Јас би ги повикала сите пациенти кои имаат Ковид-19, а кои можеби и не биле во болница, доколку имааат симптоми на отежнато дишење, намалена толеранција на напор или некои проблеми со меморијата, проблеми со крвниот притисок да побараат лекарска помош“, рече д-р Пискач-Живковиќ. (Н1)
