ПИШУВА:
Д-р Звезда Спасовска
специјалист педијатар
♦♦♦♦♦♦♦
Одвикнувањето од доење најдобро е да го прави мајката. Оставање на чување кај некој друг може да направи уште поголема лутина и вознемиреност кај детето, бидејќи освен што нема млеко како храна на детето, ја нема и неговата мајка во видикот, односно ја нема личноста која му пружа најголема сигурност, што го прави уште поисплашено. Мајката сепак треба да е со него и да пробува да му ја надомести потребата за храна со друг оброк, чаша млеко или јогурт. Сигурноста и блискоста која се добива на мајчината града да се замени со некој друг начин на изразување на истото, како пеење во прегратка, читање, галење, играње со детето во раце и сл. Ова е најдобро да се започне со подоите во тек на денот, со постепено укинување на истите. Да се пронајде начин со некој од наведените да се заспие поинаку од цицање.
Кај доенчињата после шестиот месец може да се додаде малку измолзено мајчино млеко во кашичката која му се припрема како замена за доењето, за да биде попривлечна со мирис на мајчиното млеко. Дечињата над една година по будењето да им се одвлече вниманието со зборување и објаснување дека подоцна ќе цицаат, а сега може заедно со мама да приготват убаво уреден и вкусен доручек и низ игра заедно да го изедат.
Детето треба да биде спремно и да нема друго психичко оптеретување од типот на разболување, никнување на запчиња, тргнување во градинка, отсуство на мајката од дома поради враќање на работа, преселба во друг простор за живеење и сл. Во вакви состојби треба да се почека детето да се соочи со проблемот, истиот да го надмине или да ја прифати промената, па понатаму постепено да се започне со процесот на одвикнување од доење
Од особено значење е да се воспостави убав ред во текот на денот кај детето, со внимание на распоредот на оброците, како и дневните одмори. Да се приготват и да му се понудат оброците со друга храна пред детето да почуствува глад, бидејќи кога е гладно веднаш помислува на мајчиното млеко и е нерасположено за цврста храна. Истото може да се случи и доколку се одложи пладневниот одмор, тоа станува вознемирено, плачливо, нервозно и може упорно да инсистира на доење, одбивајќи да заспие со некој друг метод како нишкање, пеење и слично.
Да се приготват и да му се понудат оброците со друга храна пред детето да почуствува глад, бидејќи кога е гладно веднаш помислува на мајчиното млеко и е нерасположено за цврста храна
Доенчињата до една година кои повеќе сакаат да цицаат, некои од нив цицаат и повеќе од десетина пати во денот, потешко се откажуваат од доењето. Затоа тој процес на одвикнување треба да биде постепен и во добро одбран момент. Детето треба да биде спремно и да нема друго психичко оптеретување од типот на разболување, никнување на запчиња, тргнување во градинка, отсуство на мајката од дома поради враќање на работа, преселба во друг простор за живеење и сл. Во вакви состојби треба да се почека детето да се соочи со проблемот, истиот да го надмине или да ја прифати промената, па понатаму постепено да се започне со процесот на одвикнување од доење.
Од особена важност во овие моменти е мајката да биде смирена, да го погали, да го пониша во својата прегратка, со смирен глас да му зборува, да му пее, и да ја пренесе таа своја смиреност и на детето
Ноќните подои знаат да бидат најтешки за укинување. Трпеливоста кај мајката е најмала со оглед на долгите и напорни денови изминати со детето, како и на детето кое сепак најмирно спие блиску до својата мајка. Од особена важност е детето да биде добро нахрането пред да си легне, за да не се буди со желба за храна, односно од глад. При будење во тек на ноќта подобро е да не му се даваат алтернативи од тип на цуцла лажалка, или пак шишенце со адаптирана формула, сокови или чај. Тоа веднаш препознава дека е изиграно и дека не ја добива брадавицата на мама и знае да биде уште повеќе луто и вознемирено.
Познати се секако и другите несакани ефекти од долготрајно држење на цуцла, и на самата уста, како и на забите. Од особена важност во овие моменти е мајката да биде смирена, да го погали, да го пониша во својата прегратка, со смирен глас да му зборува, да му пее, и да ја пренесе таа своја смиреност и на детето. Едноставно да му покаже на детето дека иако го нема доењето при кое тоа ужива, се гушка и се смирува, таа е сепак тука и понатаму да се грижи за неговата сигурност и спокој.
