Со оглед на тоа дека вакцинацијата со третата доза започна неодамна, се уште е рано да се донесат некакви заклучоци за ефектот на дополнителната доза на вакцина, особено за ефектот во однос на делта варијантата
♦♦♦♦♦♦♦
Иако вакцините, според бројните претходни најави, требаше да го означат почетокот на крајот на пандемијата на коронавирус, бројот на заразени од земјите со најголем процент на вакцинирани лица, како Израел и Исланд покажува дека ситуацијата е посложена. Ефективноста на вакцината се намалува со текот на времето, а проблем е и позаразната делта варијанта на вирусот, поради што Израел одлучи да вакцинира со трета доза на вакцината „Фајзер“.
Со оглед на тоа дека вакцинацијата со третата доза започна неодамна, се уште е рано да се донесат некакви заклучоци за ефектот на дополнителната доза на вакцина, особено за ефектот во однос на делта варијантата. Според податоците на израелското Министерство за здравство, објавени во „Тајмс оф Израел“, 14 лица кои ја примиле третата доза се заразиле со вирусот SARS-CoV-2, од кои двајца биле хоспитализирани. Она што треба да се напомене е дека не е познато дали лицата се заразиле пред или по вакцинацијата. Единаесет од 14-те заразени лица се над 60 години (и двајцата хоспитализирани се над 60 години), додека другите три се имунокомпромитирани, соопштија од Министерството.
Несаканите ефекти од третата доза се слични или дури и помалку во споредба со несаканите ефекти по втората доза. Мнозинството, или околу 88 проценти од 4.500 луѓе кои ја примиле третата доза и учествувале во студијата, се чувствувале подобро или слично како кога ја примиле и втората доза
Според податоците што ги споделија лицата вакцинирани со третата доза на „Фајзер“, несаканите ефекти од третата доза се слични или дури и помалку во споредба со несаканите ефекти по втората доза. Мнозинството, или околу 88 проценти од 4.500 луѓе кои ја примиле третата доза и учествувале во студијата, се чувствувале подобро или слично како кога ја примиле и втората доза. Околу една третина од нив пријавиле несакани ефекти, а повеќето од нив имале болка на местото на инјектирање. Еден процент од нив побарале лекарска помош за еден или повеќе несакани ефекти, а 0,4 проценти од анкетираните имале потешкотии со дишењето.
Со оглед на тоа дека Израел продолжува со третата доза на вакцинација, целиот свет со интерес ја следи ситуацијата во таа земја и ефектот на третата доза врз ширењето на инфекцијата, односно колку таа обезбедува заштита од делта варијантата на новиот коронавирус.
