Откако бебето ќе пристигне во семејството, мајките добиваат многу совети поврзани за негата и исхраната на детето. Еден од нив е и дека по секој оброк бебето мора да подригне.
Зошто е важно подригнувањето?
При цицање или хранење со млеко од шишенце, бебето голта и воздух. Со оглед дека тоа може да предизвика бљуцкање, нервоза и гасови, пожелно е бебето да подригне по оброкот, односно да се ослободи од проголтаниот воздух.
Како расте, бебето се помалку ќе подригнува, но тоа не треба да ве загрижува, тоа е само знак дека научило да не голта воздух при хранењето.
Дали мора да подригне по секој оброк?
Пожелно е бебето во првите месеци по раѓањето да подригне по секој оброк. Но, не е страшно доколку тоа не го направи, ќе подригне кога ќе се разбуди. Ако заспие, а не подригнало, само внимателно спуштете го да лежи на страна.
Исто така, ако бебето се разбуди навечер оти го мачи стомачето, слободно подигнете го да подригне, оти тоа ќе му помогне да се ослободи од грчевите.
Како да му помогнете на бебето да подригне?
Бебето треба да се земе во раце и да се стави во исправена положба. Можете и нежно да го тапкате по грбот. Во исправена положба, потпрено на вашето тело, бебето треба да остане 10 до 15 минути.
Доколку при подригнувањето, бебето бљуцне – исфрли малку млеко, не грижете се, тоа така се ослободува од вишокот храна што ја изело.
