Светската здравствена организација неодамна издаде предупредување за четири видови сируп против кашлица произведени од индиска компанија по смртта на 66 деца во Гамбија. „Лабораториските анализи на примероците од секој од четирите производи потврдуваат дека содржат недозволени количини на диетилен гликол и етилен гликол. До денес, овие четири производи се пронајдени во Гамбија, но можеби се дистрибуирани, преку неформални пазари, во други земји или региони“, се вели во соопштението.
Иако сирупите за кашлица треба целосно да се избегнуваат кај деца на возраст под две години, тие треба да се даваат со претпазливост и на постарите деца
Како што наведуваат, било утврдено дека примероците што ги тестирала Светската здравствена организација содржат диетилен гликол или етилен гликол – токсични органски растворувачи кои најчесто ги има во индустриските и домашните препарати.
Тие можат да предизвикаат сериозни несакани ефекти, вклучувајќи абдоминална болка, повраќање, дијареја, неможност за мокрење, алтернативна психичка состојба и акутна бубрежна повреда.
„Овие производи кои се пронајдени во сирупите не се безбедни и нивната употреба, особено кај малите деца, може да резултира со сериозни здравствени последици, па дури и смрт“, објаснуваат експертите кои ја направиле споменатата анализа. Но, дали сирупите против кашлица се воопшто безбедни за децата?
Педијатрите не ги препорачуваат
„Сирупите против кашлица, особено оние кои се издаваат без рецепт, не треба да се даваат на децата, особено на оние помлади од две години. Тоа е затоа што тие можат да предизвикаат сериозни несакани ефекти, а во мојата кариера сум видела случаи кога децата морале да бидат хоспитализирани поради сериозни компликации предизвикани токму од земање сируп против кашлица. Затоа, тие треба во целост да се избегнуваат“, објаснува Меена Џајарам, педијатар од „Aakash Healthcare“.
Според мислењето на струката, сирупите против кашлица треба да се избегнуваат бидејќи може да имаат благи до сериозни несакани ефекти кај децата
Со неа се согласува и педијатарот Рањет Гулијани, која нагласува дека повеќето сирупи против кашлица содржат одредени хемикалии кои се опасни за деца помлади од две години, пренесува „Indian Express“.
Според мислењето на струката, сирупите против кашлица треба да се избегнуваат бидејќи може да имаат благи до сериозни несакани ефекти кај децата. „Често се јавуваат поблаги несакани ефекти како прекумерна поспаност, немир, ниско ниво на шеќер или електролитен дисбаланс во крвта. Но, може да има и сериозни несакани ефекти кога сирупите против кашлица може да доведат до епилептични напади, оштетување на бубрезите, па дури и откажување на органите“, предупредува д-р Џајарам.
Дали се безбедни за деца постари од две години?
Иако сирупите за кашлица треба целосно да се избегнуваат кај деца на возраст под две години, тие треба да се даваат со претпазливост и на постарите деца, велат експертите.
„Над две години, тие се релативно побезбедни ако се даваат во правилните и пропишани дози. Зависи и за каква формулација се работи. Имено, поради својот состав, не сите сирупи имаат исти несакани ефекти кај постарите деца. Во овој случај, секогаш е потребно да се консултирате со лекар, кој ќе утврди дали е дозволено да се дава лекот или не, а можеби ќе препорача и некоја алтернатива“, објаснува педијатарот Гулијани.
