Идеално би било да се вакцинирате некаде околу крајот на октомври и почетокот на ноември, бидејќи оптималниот заштитен ефект се јавува две недели подоцна, а потоа полека се намалува во следните три месеци
Во пресрет на почетокот на секоја зима, лекарите апелираат постарите и болните лица да се вакцинираат против грип, а младите и здрави деца не се во нивниот фокус, но оваа зима тоа може да се промени.
Со оглед на пандемијата на коронавирус, лекарите од многу делови на светот се повеќе се склони кон вакцинирање на децата во пресрет на сезоната на грип. Бидејќи децата можат да го пренесат вирусот на грип, еден од аргументите за нивно вакцинирање е олеснување на товарот врз здравствениот систем.
Германскиот инфектолог Бернд Салцбергер, лекар од Универзитетската болница во Регенсбург, вели дека заштитата на бабите и дедовците е една од причините зошто вакцинирањето на децата е добра идеја затоа што комбинацијата на грип и COVID-19 може да се покаже фатална за старите лица.
Многу лекари се согласуваат со ова, а од Американскиот центар за контрола и превенција на болести (CDC) велат дека „вакцинирањето против грип во сезоната 2020-2021 година е најважно досега“.
„Можно е да имате коронавирус и грип истовремено, а тоа воопшто не е добра ситуација. Вакцината против грип ќе намали дел од опасностите“, објаснуваат лекарите
Сепак, многу родители се двоумат. „Една од причините е фактот дека децата на училишна возраст релативно добро го поднесуваат грипот“, вели Салцбергер. Но, ако детето го „собере“ вирусот во градинка или училиште, може да го пренесе на постарите членови на семејството на кои грипот ќе им падне многу потешко.
„И не треба да заборавиме дека коронавирусот сè уште претставува голема закана“, напоменува германскиот инфектолог. „Можно е да имате коронавирус и грип истовремено, а тоа воопшто не е добра ситуација“. Вакцината против грип едноставно намалува дел од опасностите.
- Вакцинирањето е безбедно за деца постари од шест месеци, истакнаа од институтот „Роберт Кох“, германски центар за контрола на болестите.
Оттаму велат дека идеално би било да се вакцинирате некаде околу крајот на октомври и почетокот на ноември, бидејќи оптималниот заштитен ефект се јавува две недели подоцна, а потоа полека се намалува во следните три месеци.
Сепак, најважно е да се вакцинираат лицата над 60 години, бремените жени, лицата со хронични болести и здравствени работници.
