Не е невообичаено родителите да кажат како нивното бебе спие многу подобро и подолго кога го држат во раце отколку кога го ставаат на кревет или во креветче. Ова не е ништо чудно затоа што на бебињата, особено во првите месеци, им годи контакт кожа со кожа, а тоа чувство на згриженост и топлина во прегратката им дава чувство слично на она што го имале во стомакот на нивната мајка.
Значи, сосема е разбирливо ако вашето бебе ужива да спие во ваши раце, но еве што треба да знаете и за што да водите сметка.
Дали е безбедно бебето да спие во ваши раце?
Експертот за спиење и мајка на седум деца, Рејчел Гортон, истакнува дека е безбедно вашето бебе да спие во ваши раце, доколку водите сметка за неколку работи.
Прво, најважно е да бидете будни, а не да сте на работ сами да заспиете додека вашето бебе дреме во вашите раце.
Најбезбедниот начин за вашето малечко да спие во ваши раце е вие да седите на столица лулашка, на каучот или кревет, но да бидете целосно будни.
Позицијата е исто така важна, затоа внимавајте дишните патишта на бебето да бидат отворени и детето да не е наведнато напред и да има опасност да падне на вас, додава таа.
Доколку почувствувате дека сте поспани додека го држите вашето бебе, најдобро е да го префрлите во креветчето за да може безбедно да отспие.
