Моментот кога ќе дојде време да се разделите пред влезот во училницата може да биде исклучително тежок и емотивен. Не го одложувајте заминувањето затоа што колку подолго стоите пред училницата толку потешко ќе биде
Дали се сеќавате на вашиот прв училишен ден? Заминувањето во нова средина, како што е основното училиште, може да предизвика вознемиреност кај првачињата, како и кај нивните родители.
Првиот ден во основното училиште претставува голем чекор во животот на вашето дете, па затоа не е изненадување ако чувствувате возбуда помешана со страв. Не дозволувајте тој страв да завладее со вас. Бидете свесни дека вашиот страв може многу лесно да се пренесе на вашето дете. Исто така, колку сте вие помирни, толку ќе биде посмирено и детето.
Моментот кога ќе дојде време да се разделите пред влезот во училницата може да биде исклучително тежок и емотивен. Не го одложувајте заминувањето затоа што колку подолго стоите пред училницата толку потешко ќе биде. Кога ќе дојде време детето да влезе во училиштето или училницата, поздравете се со него и кажете му дека ќе го чекате кога ќе заврши наставата.
Смислете мал ритуал и повторувајте го на секое одење и збогување на училиште. Тоа може да биде, на пример, посебен начин на ракување со детето или посебна прегратка. Ако се плашите дека може да има солзи, смислете систем на наградување давајќи му на вашето дете по една ѕвезда или друг симбол за секоја разделба без солзи. Ако на крајот на неделата има пет ѕвездички, наградете го со омиленото благо или некоја друга ситница.
Запознајте ги другите родители и обидете се да ги научите имињата на повеќето од децата во одделението. Кога детето ќе ве види како ги повикувате неговите пријатели по име, училиштето ќе му се чини како многу поудобна и попозната средина.
Иако на почетокот може да изгледа страшно, по неколку недели вие и вашето дете потполно ќе се навикнете на секојдневното одење на училиште и разделбите ќе ви бидат се полесни.
